Read nynorsk 1978 2. Kongebok 12 Bible Online

2. Kongebok 12 - nynorsk 1978 bible

2. Kongebok 12

¹Det var i det sjuande styringsåret åt Jehu at Joasj vart konge, og han styrte i Jerusalem i førti år. Mor hans heitte Sibja og var frå Be’er-Sjeba.

²Joasj gjorde alltid det som rett var i Herrens augo, så lenge presten Jojada rettleidde han.

³Men offerhaugane vart ikkje nedlagde. Folket heldt fram med å slakta og ofra på haugane.

⁴Joasj sa til prestane: «Alle dei heilage gåvene som kjem inn til Herrens hus i pengar, både det som kvar einskild er ilikna i skatt, og det som nokon sjølvmint kjem til Herrens hus med,

⁵det skal prestane ta imot, kvar frå dei han kjenner. Så skal dei setja Herrens hus i stand, alle stader der det er skadt.

⁶Men i det tjuetredje året Joasj var konge, hadde prestane endå ikkje vølt templet der det var skadt.

⁷Då kalla kong Joasj presten Jojada og dei andre prestane til seg og sa: «Kvifor bøter de ikkje brestene i Herrens hus? No skal de ikkje lenger ta imot pengar av kjenningane dykkar, men gje dei frå dykk, så templet kan setjast i stand.»

⁸Prestane gjekk med på at dei ikkje skulle ta imot pengar av folket lenger. Men så skulle dei heller ikkje vøla templet.

⁹No tok presten Jojada ei kiste, bora hol i loket og sette henne attmed altaret, på høgre sida av inngangen til templet. I den la prestane som heldt vakt ved inngangen, alle pengane som kom inn til Herrens hus.

¹⁰Når dei såg at det var mange pengar i kista, kom skrivaren åt kongen og overpresten; dei samla pengane som fanst i Herrens hus, og talde dei opp.

¹¹Så vog dei opp pengane og gav dei til arbeidsleiarane som hadde tilsyn med Herrens hus. Og dei gav dei til tømmermennene og bygningsmennene som arbeidde på huset,

¹²og til murarane og steinhoggarane. Desse pengane nytta dei òg til å kjøpa trevyrke og hoggen stein, så dei kunne setja Herrens hus i stand att. Såleis greidde dei alle utgiftene då templet skulle vølast.

¹³Men dei pengane som kom inn til templet, vart ikkje nytta til å laga sølvbollar, knivar, offerskåler, trompetar eller noko slag kar av gull eller sølv.

¹⁴Pengane vart gjevne til arbeidsleiarane, som nytta dei til å vøla på Herrens hus.

¹⁵Ingen heldt rekneskap med dei mennene som tok imot pengane og gav dei til arbeidsleiarane; for dei fór ærleg fram.

¹⁶Men pengane som kom inn ved skuldoffer og syndoffer, gjekk ikkje til Herrens hus; dei fekk prestane.

¹⁷På den tid gjorde aramearkongen Hasael ei hærferd mot Gat. Då han hadde teke byen, sette han seg føre å gå mot Jerusalem.

¹⁸Då tok Joasj, Juda-kongen, alle dei heilage tinga som fedrane hans, Juda-kongane Josjafat, Joram og Akasja, hadde vigt til templet, og det han sjølv hadde vigt. Saman med alt gullet og sølvet som fanst i skattkammera, både i Herrens hus og i kongsgarden, sende han det til Hasael, aramearkongen. Då drog han bort og gjekk ikkje mot Jerusalem.

¹⁹Det som elles er å seia om Joasj og alt det han gjorde, det står skrive i krønikeboka åt Juda-kongane.

²⁰Mennene åt kongen reiste seg mot han og fekk til ei samansverjing. Dei drap Joasj i Millo-huset, då han var på veg ned til Silla. [18]

²¹Dei kongsmennene som drap han, var Josakar, son til Sjimat, og Josabad, son til Sjomer. Då han var død, gravla dei han hjå fedrane hans i Davids-byen, og Amasja, son hans, vart konge etter han.