Read nynorsk 1978 1. Krønikebok 11 Bible Online

1. Krønikebok 11 - nynorsk 1978 bible

1. Krønikebok 11

¹Heile Israel kom saman hjå David i Hebron og sa: «Du veit vi er same folket, vi og du.

²Alt for lenge sidan, då Saul var konge, var det du som førte Israel både ut i striden og heim att. Herren din Gud har sagt til deg: Du skal vera hyrding for Israel, folket mitt, du skal vera fyrste over Israel.»

³Så kom alle dei eldste i Israel til kongen i Hebron. David gjorde ei pakt med dei der for Herrens åsyn. Og dei salva han til konge over Israel, som Herren hadde sagt gjennom Samuel.

⁴No drog David og heile Israel til Jerusalem — det er det same som Jebus. Der budde jebusittane.

⁵Då sa folket i Jebus til David: «Her kjem du aldri inn!» Men David tok Sion-borga, som no er Davids-byen.

⁶Den gongen sa David: «Den som fyrst feller ein jebusitt, skal vera hovding og førar.» Joab, son til Seruja, kom fyrst opp, og han vart hovding.

⁷David slo seg ned i borga; difor kalla dei henne Davids-byen.

⁸Han bygde byen rundt ikring, frå Millo og utover. Og Joab bygde opp att resten av byen. [16]

⁹Sidan auka Davids velde meir og meir; for Herren, Allhærs Gud, var med han.

¹⁰Dette er dei fremste av krigarane til David. Saman med heile Israel gav dei kongedømet hans sterk støtte, så dei fekk gjort han til konge etter Herrens ord om Israel.

¹¹Vi skal no rekna opp krigarane til David: Fyrst var det Jasjobam av Hakmon-ætta, hovding over dei tre. Det var han som svinga spydet sitt over tre hundre falne på ein gong. [17] [18]

¹²Etter han kom Elasar, son til Dodo frå Akoak. Han var ei av dei tre kjempene.

¹³Han var med David ved Pas-Dammim då filistarane hadde samla seg til strid. Det var ein tett byggåker der, og då folket rømde for filistarane,

¹⁴gjekk Elasar midt ut i åkeren og verna han. Han hogg ned filistarar, og Herren lét han vinna ein stor siger.

¹⁵Ein gong fór tre av dei tretti hovdingane ned over berget til David, som var i hola ved Adullam. Filistarhæren låg i leir i Refa’im-dalen. [19] [20]

¹⁶David heldt då til i fjellborga, og forposten åt filistarane låg ved Betlehem. [21]

¹⁷Då fekk David hug på vatn og sa: «Gjev einkvan ville henta vatn til meg frå brunnen ved byporten i Betlehem!»

¹⁸Dei tre kjempene braut seg gjennom filistarleiren, auste opp vatn or brunnen ved byporten i Betlehem og tok det med seg til David. Men han ville ikkje drikka. Han rende det ut for Herrens åsyn

¹⁹og sa: «Gud fri meg frå å gjera noko slikt! Skulle eg drikka blodet åt desse mennene som våga livet sitt?» For dei våga livet då dei henta vatn. Og han ville ikkje drikka. — Dette gjorde dei tre kjempene.

²⁰Så var det Absjai, bror til Joab; han var hovding over dei tretti. Ein gong svinga han spydet sitt over tre hundre falne og fekk eit stort namn mellom dei tretti. [22]

²¹Han var høgt vørd mellom dei tretti og vart hovdingen deira. Men han kom ikkje opp mot dei tre.

²²Benaja Jojadason frå Kabse’el var ein mektig mann og gjorde mange storverk. Han slo i hel dei to kjempene frå Moab. Ein gong det hadde snøa, steig han ned i ein brunn og drap ei løve.

²³Like eins felte han ein kjempestor egyptar, som var fem alner høg. I handa hadde egyptaren eit spyd, så tjukt som ein vevbom. Men Benaja gjekk imot han med ein stav, reiv spydet ut or handa hans og drap han med hans eige spyd.

²⁴Dette gjorde Benaja Jojadason, og han fekk eit stort namn mellom dei tretti krigarane.

²⁵Han var høgt vørd mellom dei tretti; men han kom ikkje opp mot dei tre. David sette han over livvakta si.

²⁶Dei djervaste krigarane var: Asael, bror til Joab; Elkanan, son til Dodo, frå Betlehem;

²⁷Sjammot frå Harod; Heles frå Pelet;

²⁸Ira, son til Ikkesj, frå Tekoa; Abieser frå Anatot;

²⁹Sibbekai frå Husja; Ilai frå Akoak;

³⁰Mahrai frå Netofa; Heled, son til Ba’ana, frå Netofa;

³¹Itai, son til Ribai, frå Gibea i Benjamin; Benaja frå Piraton;

³²Hurai frå Ga’asjdalane; Abiel frå Bet-Araba;

³³Asmavet frå Bakurim; Eljakba frå Sja’albon;

³⁴Hasjem-sønene frå Gison; Jonatan, son til Sjage, frå Harar;

³⁵Akiam, son til Sjarar, frå Harar; Elifal, son til Ur;

³⁶Hefer frå Mekera; Akia frå Pelet;

³⁷Hesro frå Karmel; Na’arai, son til Esbai;

³⁸Joel, bror til Natan; Mibhar, son til Hagri;

³⁹Selek frå Ammon; Nakrai frå Be’erot, våpensveinen til Joab, son til Seruja;

⁴⁰Ira frå Jattir; Gareb frå Jattir;

⁴¹hetitten Uria; Sabad, son til Aklai;

⁴²Adina, son til Sjisa, frå Ruben, hovding over Rubens-sønene, og tretti mann med han;

⁴³Hanan, son til Ma’aka; Josjafat frå Mitne;

⁴⁴Ussia frå Asjtera; Sjama og Je’iel, sønene til Hotam, frå Aroer;

⁴⁵Jediael, son til Sjimri, og Joka, bror hans, frå Tis;

⁴⁶Eliel frå Mahanajim, Jeribai og Josjavja, sønene til Elna’am, og Jitma frå Moab;

⁴⁷Eliel, Obed og Ja’asiel frå Soba.