Read nynorsk 1978 1. Krønikebok 14 Bible Online

1. Krønikebok 14 - nynorsk 1978 bible

1. Krønikebok 14

¹Hiram, kongen i Tyrus, sende nokre menn til David. Dei kom med sedertre og hadde med seg steinhoggarar og tømmermenn, som skulle byggja eit hus åt han.

²David skjøna at Herren hadde stadfest kongedømet hans; for riket hans hadde nått høgt i vørdnad på grunn av Israel, folket hans.

³David tok seg fleire koner i Jerusalem, og han fekk endå fleire søner og døtrer.

⁴Dette er namna på dei sønene han fekk i Jerusalem: Sjammua, Sjobab, Natan, Salomo,

⁵Jibhar, Elisjua, Elpelet,

⁶Nogah, Nefeg, Jafia,

⁷Elisjama, Be’eljada og Elifelet.

⁸Då filistarane høyrde at David var salva til konge over heile Israel, drog dei alle ut og ville få tak i han. Men David fekk greie på det og drog ut imot dei.

⁹Filistarane kom og spreidde seg ut over Refa’im-dalen.

¹⁰Då spurde David Gud til råds: «Skal eg dra mot filistarane? Vil du gje dei i mine hender?» Og Herren svara: «Dra du; eg vil gje dei i dine hender.»

¹¹Så fór David til Ba’al-Perasim, og der slo han dei. Då sa han: «Gud har brote igjennom fiendens rekkjer ved mi hand liksom vatn bryt igjennom ei demning.» Difor kallar dei den staden Ba’al-Perasim. [29]

¹²Der lét filistarane etter seg gudebileta sine, og David sa frå at dei skulle brennast.

¹³Men filistarane kom att og spreidde seg ut over dalen.

¹⁴Då spurde David Herren til råds ein gong til, og han svara: «Du skal ikkje fylgja rett etter dei, men ta ein omveg, så du kjem over dei midt for bakatrea.

¹⁵Når du høyrer lyden av steg over tretoppane, skal du gå til strid. For då har Gud drege ut framføre deg og vil slå filistarane.»

¹⁶David gjorde som Gud hadde sagt, og han slo filistarhæren og forfylgde dei frå Gibeon til Geser.

¹⁷Gjetordet om David nådde ut til alle land, og Herren laga det så at alle folkeslag vart redde for han.