Read nynorsk 1978 1. Krønikebok 20 Bible Online

1. Krønikebok 20 - nynorsk 1978 bible

1. Krønikebok 20

¹Året etter, på den tid kongane plar fara i hærferd, drog Joab ut med hæren sin og herja ammonittlandet. Då han kom til Rabba, kringsette han byen. Sjølv sat David heime i Jerusalem. Men Joab tok Rabba og øydela han.

²David tok krona av hovudet på ammonittkongen. Han fann at ho var av gull og vog ein talent, og ho var prydd med ein edelstein. No kom ho på Davids hovud. Han tok stort hærfang i byen og førte det med seg.

³Folket som budde der, førte han bort. Han sette dei til å arbeida med sager, jernhakker og øksar. Såleis gjorde David med alle ammonittbyane. Så fór han heim att til Jerusalem med heile hæren.

⁴Sidan kom det til strid med filistarane ved Geser. Der felte Sibbekai av Husja-ætta ein mann som heitte Sippai og var ein av etterkomarane etter Rafa. Då vart dei kua.

⁵Endå ein gong kom det til strid med filistarane, og Elkanan, son til Ja’ir, felte Lakmi, bror til Goliat frå Gat, som hadde eit spydskaft så tjukt som ein vevbom.

⁶Sidan kom det til slag ved Gat. Der var det ein kjempekar som hadde seks fingrar på kvar hand og seks tær på kvar fot, tjuefire fingrar og tær i alt. Han òg var ætta frå Rafa. [36]

⁷Mannen spotta Israel. Men Jonatan, son til Sjima, som var bror til David, hogg han ned.

⁸Alle desse var ætta frå Rafa i Gat. Men David og mennene hans felte dei.