Read nynorsk 1978 1. Krønikebok 23 Bible Online

1. Krønikebok 23 - nynorsk 1978 bible

1. Krønikebok 23

¹Då David var gamal og mett av dagar, sette han Salomo, son sin, til konge over Israel.

²Så kalla han saman alle hovdingane i Israel og prestane og levittane.

³Det vart halde manntal over levittane, så mange som var tretti år eller meir, og talet på menn var trettiåtte tusen.

⁴Kongen sa: «Av desse skal tjuefire tusen stå for arbeidet på Herrens hus, og seks tusen skal vera tilsynsmenn og domarar.

⁵Fire tusen skal vakta dørene, og fire tusen skal lovsyngja Herren til tonar frå dei instrument som eg har fått laga til bruk ved lovsongen.»

⁶David delte dei inn i skift etter Levi-sønene Gersjon, Kehat og Merari.

⁷Til Gersjon-sønene høyrde Ladan og Sjimi.

⁸Sønene til Ladan var Jehiel, som var hovding, og Setam og Joel, tre i talet.

⁹Sønene til Sjimi var Sjelomot, Hasiel og Haran, tre i talet. Det var hovdingane i Ladan-ættene.

¹⁰Sønene til Sjimi var Jahat, Sisa, Je’usj og Beria. Det var Sjimi-sønene, fire i talet.

¹¹Jahat var hovding, så kom Sisa. Je’usj og Beria hadde ikkje mange søner; difor vart dei rekna for ei ættgrein, eitt yrkeslag.

¹²Sønene til Kehat var Amram, Jishar, Hebron og Ussiel, fire i talet.

¹³Sønene til Amram var Aron og Moses. Aron vart utskild, så han og sønene hans til alle tider skulle vigsla dei høgheilage tinga, bera fram offer for Herren og lysa velsigning i hans namn til evig tid.

¹⁴Men sønene til Moses, gudsmannen, skulle reknast til Levi-ætta.

¹⁵Sønene hans var Gersjom og Elieser.

¹⁶Gersjom hadde sonen Sjubael, som var hovding.

¹⁷Son til Elieser, Rehabja, var òg hovding. Elieser hadde ikkje fleire søner, men sønene til Rehabja var svært mange.

¹⁸Jishar hadde sonen Sjelomit, som var hovding.

¹⁹Av Hebron-sønene var Jeria hovding; den andre var Amarja, den tredje Jahasiel og den fjerde Jekamam.

²⁰Av Ussiel-sønene var Mika hovding, og så kom Jisjia.

²¹Merari-sønene var Makli og Musji. Sønene til Makli var Elasar og Kisj.

²²Då Elasar døydde, var det ingen søner etter han, berre døtrer; dei gifte seg med frendane sine, sønene til Kisj.

²³Sønene til Musji var Makli, Eder og Jeremot, tre i talet.

²⁴Dette var Levi-sønene, kvar ættgrein for seg, alle ættehovdingane som vart talde og nemnde med namn, ein for ein. Dei var det som stelte med tenesta i Herrens hus, og det gjorde dei frå tjueårsalderen og oppover.

²⁵David sa: «No har Herren, Israels Gud, gjeve folket sitt ro og vil bu i Jerusalem til evig tid.

²⁶Difor treng ikkje levittane bera teltet meir, eller noko av alt det som høyrer med til tenesta der.»

²⁷For det var etter dei siste føresegnene frå David at det vart halde manntal over levittane, så mange som var tjue år eller meir.

²⁸Det dei fekk i oppgåve, var å hjelpa Arons-sønene med tenesta i Herrens hus. Dei skulle ha tilsyn med føregardane og sideroma, syta for at alt det heilage vart halde reint, og greia alt arbeid som fylgde med tenesta i Guds hus —

²⁹stella med skodebrøda, kveitemjølet til grødeofferet og dei usyrte brødleivane, med det som vert steikt på helle, og med deigen som vert knadd; dei skulle òg sjå etter alle mål, både holmål og lengdemål.

³⁰Kvar morgon skulle dei stå og lova og prisa Herren, og like eins kvar kveld.

³¹Dei skulle hjelpa til kvar gong det vart frambore brennoffer for Herren, på sabbatane, nymånedagane og høgtidene. Så ofte som fastsett var, skulle dei stiga fram for Herren.

³²Såleis skulle dei syta for tenesta i møteteltet og heilagdomen, den tenesta som Arons-sønene, brørne deira, tek seg av i Herrens hus.