Read nynorsk 1978 1. Krønikebok 25 Bible Online

1. Krønikebok 25 - nynorsk 1978 bible

1. Krønikebok 25

¹Så skilde David og leiarane for gudstenesta ut sønene til Asaf, Heman og Jedutun, som i profetisk glød skulle spela på lyre, harpe og cymbel. Dette er lista over dei mennene som stod for denne tenesta:

²av Asaf-sønene: Sakkur, Josef, Netanja og Asarela — Asaf styrte sjølv songen, og spela i profetisk glød så som kongen hadde sagt føre;

³av Jedutun, det vil seia sønene til Jedutun: Gedalja, Seri, Jesaja, Hasjabja og Mattitja, seks i talet — dei stod under Jedutun, far sin, som i profetisk glød spela på lyre til Herrens lov og pris;

⁴av Heman, det vil seia sønene til Heman: Bukkia, Mattanja, Ussiel, Sjubael, Jerimot, Hananja, Hanani, Eliata, Giddalti, Romamti-Eser, Josjbekasja, Malloti, Hotir og Mahasiot.

⁵Dei var alle sønene til Heman, sjåaren åt kongen. Han hadde Gud lova stor kraft. Difor gav han Heman fjorten søner og tre døtrer.

⁶Alle desse stod under fedrane sine, Asaf, Jedutun og Heman, når dei var med på gudstenesta i Herrens hus og song til tonane frå cymblar, harper og lyrer, alt etter føresegn frå kongen.

⁷Talet på dei og brørne deira som var opplærte til å syngja for Herren, var to hundre og åttiåtte, dugande songarar alle saman.

⁸Dei kasta lodd om arbeidet sitt, og alle stod likt, den minste som den største, meisteren som læresveinen.

⁹Det fyrste loddet fall på Josef av Asaf-ætta; den andre var Gedalja, han sjølv og brørne og sønene hans, tolv i talet;

¹⁰den tredje var Sakkur med søner og brør, tolv i talet.

¹¹Det fjerde loddet fall på Jisri med søner og brør, tolv i talet;

¹²den femte var Netanja med søner og brør, tolv i talet;

¹³den sjette var Bukkia med søner og brør, tolv i talet;

¹⁴den sjuande var Jesarela med søner og brør, tolv i talet;

¹⁵den åttande var Jesaja med søner og brør, tolv i talet;

¹⁶den niande var Mattanja med søner og brør, tolv i talet;

¹⁷den tiande var Sjimi med søner og brør, tolv i talet;

¹⁸den ellevte var Asarel med søner og brør, tolv i talet.

¹⁹Det tolvte loddet fall på Hasjabja med søner og brør, tolv i talet;

²⁰den trettande var Sjubael med søner og brør, tolv i talet;

²¹den fjortande var Mattitja med søner og brør, tolv i talet.

²²Det femtande loddet fall på Jeremot med søner og brør, tolv i talet;

²³det sekstande fall på Hananja med søner og brør, tolv i talet;

²⁴det syttande fall på Josjbekasja med søner og brør, tolv i talet;

²⁵det attande fall på Hanani med søner og brør, tolv i talet;

²⁶det nittande fall på Malloti med søner og brør, tolv i talet;

²⁷det tjuande fall på Eliata med søner og brør, tolv i talet;

²⁸det tjuefyrste fall på Hotir med søner og brør, tolv i talet;

²⁹det tjueandre fall på Giddalti med søner og brør, tolv i talet;

³⁰det tjuetredje fall på Mahasiot med søner og brør, tolv i talet,

³¹og det tjuefjerde fall på Romamti-Eser med søner og brør, tolv i talet.