Read nynorsk 1978 1. Krønikebok 27 Bible Online

1. Krønikebok 27 - nynorsk 1978 bible

1. Krønikebok 27

¹Dette er talet på ættehovdingane åt israelittane, tusenmannsførarane og hundremannsførarane og tilsynsmennene som tente kongen i alt det som hadde med hærflokken å gjera. Heile året arbeidde desse flokkane på skift, ein månad om gongen, og kvar av dei var på tjuefire tusen mann.

²Over den fyrste hærflokken, som gjorde teneste i den fyrste månaden, stod Jasjobam, son til Sabdiel. Flokken hans var på tjuefire tusen mann.

³Han var ætta frå Peres og var den øvste av alle dei hærførarane som gjorde teneste i den fyrste månaden.

⁴Over den hærflokken som gjorde teneste i den andre månaden, stod Dodai frå Akoak. Miklot var ein av førarane i flokken hans, som var på tjuefire tusen mann.

⁵Den tredje hærføraren, han som gjorde teneste i den tredje månaden, var Benaja, son til presten Jojada. Han var den øvste i hærflokken og hadde tjuefire tusen mann under seg.

⁶Denne Benaja var ei kjempe mellom dei tretti hovdingane og stod over dei. Ammisabad, son hans, var òg med i flokken hans. [41]

⁷Den fjerde hærføraren, han som gjorde teneste i den fjerde månaden, var Asael, bror til Joab, og etter han Sebadja, son hans. Hærflokken hans var på tjuefire tusen mann.

⁸Den femte, han som gjorde teneste i den femte månaden, var Sjamhut, ein hærførar av Serah-ætta. Hærflokken hans var på tjuefire tusen mann.

⁹Den sjette, han som gjorde teneste i den sjette månaden, var Ira, son til Ikkesj, frå Tekoa. Hærflokken hans var på tjuefire tusen mann.

¹⁰Den sjuande, han som gjorde teneste i den sjuande månaden, var Heles frå Pelet, av Efraims-ætta. Hærflokken hans var på tjuefire tusen mann.

¹¹Den åttande, han som gjorde teneste i den åttande månaden, var Sibbekai, ein av Serah-sønene av Husja-ætta. Hærflokken hans var på tjuefire tusen mann.

¹²Den niande, han som gjorde teneste i den niande månaden, var Abieser frå Anatot, av Benjamins-ætta. Hærflokken hans var på tjuefire tusen mann.

¹³Den tiande, han som gjorde teneste i den tiande månaden, var Mahrai frå Netofa, av Serah-ætta. Hærflokken hans var på tjuefire tusen mann.

¹⁴Den ellevte, han som gjorde teneste i den ellevte månaden, var Benaja frå Piraton, av Efraims-ætta. Hærflokken hans var på tjuefire tusen mann.

¹⁵Den tolvte, han som gjorde teneste i den tolvte månaden, var Heldai frå Netofa, av Otniels-ætta. Hærflokken hans var på tjuefire tusen mann.

¹⁶Hovdingane for Israels-ættene var: for Rubens-sønene Elieser, son til Sikri; for Simeons-sønene Sjefatja, son til Ma’aka;

¹⁷for Levi Hasjabja, son til Kemuel; for Aron Sadok;

¹⁸for Juda Elihu, ein av brørne til David; for Jissakar Omri, son til Mikael;

¹⁹for Sebulon Jisjmaja, son til Obadja; for Naftali Jerimot, son til Asriel;

²⁰for Efraims-sønene Hosea, son til Asasja; for den eine halvparten av Manasse-ætta Joel, son til Pedaja;

²¹for den andre halvparten av Manasse-ætta, den i Gilead, Jiddo, son til Sakarja; for Benjamin Ja’asiel, son til Abner;

²²for Dan Asarel, son til Jeroham. Dette var hovdingane for Israels-ættene.

²³David tok ikkje tal på dei som var under tjue år. For Herren hadde sagt at han ville gjera israelittane talrike som stjernene på himmelen.

²⁴Joab, son til Seruja, tok til å telja, men fullførte ikkje. Difor kom Guds vreide over Israel, og talet vart ikkje oppskrive i årbøkene åt kong David.

²⁵Asmavet, son til Adiel, hadde tilsyn med skattane åt kongen, og Jonatan, son til Ussia, med lagera ute på landet, i byar, landsbyar og festningstårn.

²⁶Esri, son til Kelub, hadde tilsyn med dei som arbeidde på marka og dyrka jorda.

²⁷Sjimi frå Rama såg til med vingardane og Sabdi frå Sjefam med vinlagera i vingardane.

²⁸Ba’al-Hanan frå Geder hadde tilsyn med oliventrea og morbærtrea i Sjefela og Joasj med oljelagera.

²⁹Sjitrai frå Saron såg til med storfeet som gjekk på beite i Saron, og Sjafat, son til Adlai, med storfeet i dalane,

³⁰Obil frå Ismael med kamelane, Jekdeja frå Meronot med esla

³¹og Jasis, hagritten, med småfeet. Alle desse var tilsynsmenn over eigedomen åt kong David.

³²Jonatan, farbror til David, var rådgjevar. Han var ein klok og skriftlærd mann. Jehiel, son til Hakmoni, fylgde alltid kongssønene.

³³Akitofel var rådgjevaren åt kongen, og Husjai av Arak-ætta var venen hans.

³⁴Etter Akitofel kom Jojada, son til Benaja, og Ebjatar. Joab var hærføraren åt kongen.