Read nynorsk 1978 2. Krønikebok 15 Bible Online

2. Krønikebok 15 - nynorsk 1978 bible

2. Krønikebok 15

¹Guds Ande kom over Asarja, son til Oded.

²Han steig fram for Asa og sa til han: «Høyr på meg, Asa og alle de frå Juda og Benjamin! Herren er med dykk så sant de held dykk til han. Og søkjer de han, lagar han det så at de finn han. Men vender de dykk bort frå han, vender han seg bort frå dykk.

³I lang tid hadde Israel ingen sann Gud, ingen prest som lærte dei, og inga lov.

⁴Men når dei kom i naud, vende dei om til Herren, Israels Gud, og søkte han, og då laga han det så at dei fann han.

⁵I dei dagar kunne ingen ferdast trygt, korkje ute eller heime; for det var stor uro mellom folk i alle land.

⁶Folk støytte mot folk og by mot by; for Gud skapte uro mellom dei med allslags trengsler.

⁷Men ver ved godt mot, og lat ikkje hendene siga! De skal nok få løn for det de gjer.»

⁸Då Asa høyrde desse orda og den spådomen som Asarja, son til Oded, bar fram, fekk han nytt mot og sytte for å få bort dei ufyselege gudebileta i heile Juda og Benjamin og i dei byane han hadde teke i Efraims-fjella. Og han sette i stand Herrens altar som stod framfor forhalla i templet.

⁹Så kalla han saman alt folket i Juda og Benjamin og dei innflyttarane frå Efraim, Manasse og Simeon som budde mellom dei. For mange israelittar hadde gått over til Asa då dei såg at Herren hans Gud var med han.

¹⁰I det femtande styringsåret åt Asa, i den tredje månaden, samla folket seg i Jerusalem.

¹¹Same dagen ofra dei til Herren sju hundre oksar og sju tusen sauer av det hærfanget dei var komne heim med.

¹²Og dei gjorde den avtalen at dei skulle søkja Herren, sine fedrars Gud, av heile sitt hjarta og heile sin hug,

¹³og at alle som ikkje søkte Herren, Israels Gud, skulle døy, både små og store, menn og kvinner.

¹⁴Dei svor Herren truskap med høg røyst og med fagnadrop medan trompetar og horn ljoma.

¹⁵Og heile Juda-folket gledde seg over denne eiden; for dei hadde svore han av heile sitt hjarta og søkt Herren med all sin vilje. Difor laga han det så at dei fann han, og han gav dei ro på alle kantar.

¹⁶Kong Asa tok jamvel frå Ma’aka, farmor si, dei rettar som fylgde med det å vera kongsmor, fordi ho hadde laga eit grysjeleg bilete for Asjera. Dette biletet hogg han ned, knuste det og brende det i Kedron-dalen.

¹⁷Men offerhaugane i Israel vart ikkje nedlagde. Likevel heldt Asa seg til Herren av heile sitt hjarta så lenge han levde.

¹⁸Dei gåvene som far hans hadde vigt til Herren, og dei han sjølv hadde vigt, førte han til Guds hus. Det var både sølv og gull og andre ting.

¹⁹Det var ingen ufred før i det trettifemte styringsåret åt Asa.