Read nynorsk 1978 2. Krønikebok 4 Bible Online

2. Krønikebok 4 - nynorsk 1978 bible

2. Krønikebok 4

¹Så laga Salomo eit altar av bronse. Det var tjue alner langt, tjue alner breitt og ti alner høgt.

²Sidan laga han det støypte havet. Det mælte ti alner frå kant til kant og var heilt rundt. Høgda var fem alner, og det trongst ei snor på tretti alner om ho skulle nå rundt det. [4]

³Nedanfor kanten var det bilete av oksar rundt ikring. Dei gjekk rundt heile havet, ti på kvar alen. Det var to rader med oksar, og dei var støypte i eitt med havet.

⁴Havet stod på tolv oksar. Tre snudde mot nord, tre mot vest, tre mot sør og tre mot aust, og dei stod alle med bakkroppen innover. Havet kvilte på dei.

⁵Sjølve karet var ei handsbreidd tjukt, og kanten var laga som kanten på eit staup, på skap som ein lotusblom. Det tok tre tusen bat.

⁶Så laga han ti kjelar og sette fem på høgre og fem på venstre sida. I dei skulle dei skylja det som høyrde brennoffera til. Men prestane skulle vaska seg i havet.

⁷Salomo fekk òg laga ti ljosestakar av gull, så som dei skulle vera. Dei sette han i tempelromet, fem på høgre og fem på venstre sida.

⁸Han laga ti bord som han sette i tempelromet, fem på høgre og fem på venstre sida; og han laga hundre offerskåler av gull.

⁹Så bygde han føregarden for prestar og den store tempelgarden med dører til, og dørene kledde han med bronse.

¹⁰Havet sette han på sørsida av templet, ved det sør-austre hjørnet.

¹¹Hiram laga oskefata, eldskuflene og offerskålene. Dermed hadde han fullført det arbeidet han skulle gjera for kong Salomo til Guds hus:

¹²to søyler, to skåler på søylehovuda øvst på søylene; to flettverksarbeid til å leggja over dei to skålene;

¹³dei fire hundre granatepla til dei to flettverka, to rader med granateple til kvart flettverk, til å leggja over dei to skålene på søylehovuda;

¹⁴dei ti fotstykka med dei ti kjelane på;

¹⁵havet — det var berre eitt — med dei tolv oksane under;

¹⁶oskefata, eldskuflene og kjøtgaflane. Alt dette som meisteren Hiram laga for kong Salomo til Herrens hus, var av skinande bronse.

¹⁷Det var på Jordan-sletta kongen fekk dei støypte, i den faste leirjorda mellom Sukkot og Saretan.

¹⁸Salomo laga ei stor mengd med slike ting. Ingen kunne seia kor mykje bronsen vog.

¹⁹Salomo fekk òg laga alt det andre som skulle vera i Guds hus: gullaltaret og borda som skodebrøda skulle liggja på;

²⁰ljosestakane med lamper som skulle kveikjast på føreskriven måte — dei stod framfor det inste romet og var av fint gull;

²¹blomane, lampene og ljosesaksene av gull, ja, av reint gull;

²²knivane, offerskålene, kannene og glopannene, alt av fint gull. Og i inngangane til huset var både dei dørene som førte inn til det høgheilage romet, og dei som førte inn til det heilage romet, av gull.