Read nynorsk 1978 Esra 5 Bible Online

Esra 5 - nynorsk 1978 bible

Esra 5

¹Profeten Haggai og profeten Sakarja, soneson til Iddo, tala til jødane i Judea og Jerusalem; i namnet åt Israels Gud tala dei til dei.

²Då gjekk Serubabel, son til Sjealtiel, og Josva, son til Josadak, i gang med å byggja Guds hus i Jerusalem, og dei to Guds profetar var med og stødde dei.

³Tattenai, statthaldaren i provinsen vestanfor Eufrat, og Sjetar-Bosnai og embetsbrørne deira kom straks til dei og spurde: «Kven har gjeve dykk lov til å byggja dette templet og setja denne muren i stand?»

⁴Og dei heldt fram: «Kva heiter dei mennene som set opp denne bygningen?»

⁵Men Guds auga vakte over dei eldste mellom jødane. Statthaldaren og mennene hans hindra dei ikkje i arbeidet, for dei ville venta til Dareios hadde fått melding om saka, og dei hadde fått brev frå han.

⁶Dette er ei avskrift av brevet som Tattenai, statthaldaren i provinsen vestanfor Eufrat, og Sjetar-Bosnai og embetsbrørne hans, embetsmennene i provinsen, sende til kong Dareios.

⁷Så lydde meldinga som dei sende: Til kong Dareios. Ver helsa!

⁸Kongen skal vita at vi har gjort ei ferd til Judea-distriktet, til templet åt den store Gud. Det vert no bygt opp att med tilhogne steinar, og murane vert kledde med tre. Arbeidet vert gjort med iver og har god framgang.

⁹Vi tala med dei eldste der og spurde: «Kven har gjeve dykk lov til å byggja dette templet og setja denne muren i stand?»

¹⁰Vi spurde òg kva leiarane deira heitte, for vi ville skriva opp namna og gje dei til deg.

¹¹Dette var svaret dei gav oss: «Vi er tenarar for han som er Gud i himmelen og på jorda, og vi byggjer opp att det templet som vart reist her for mange år sidan. Det var ein stor konge i Israel som bygde og fullførte det.

¹²Men fedrane våre gjorde Gud i himmelen harm. Difor gav han dei i hendene på kaldearen Nebukadnesar, kongen i Babylonia; han øydela templet og førte folket bort til Babylonia.

¹³Men i det fyrste året Kyros var konge i Babylonia, baud han at templet skulle byggjast opp att.

¹⁴Kong Kyros tok òg ut or templet i Babylon dei gullkar og sølvkar som hadde høyrt Guds hus til, og som Nebukadnesar hadde ført dit frå templet i Jerusalem. Han gav dei til ein mann som heitte Sjesbassar, som han hadde gjort til statthaldar,

¹⁵og sa: Ta desse kara, far av stad og set dei i templet i Jerusalem! For Guds hus skal no byggjast opp att på same staden som før.

¹⁶Så kom då Sjesbassar til Jerusalem og la grunnvollen til Guds hus. Sidan har dei bygt på det til denne dag; men enno er det ikkje ferdig.»

¹⁷Om kongen så synest, så set folk til å sjå etter i dei kongelege skattkammera i Babylonia om kong Kyros har gjeve påbod om at templet i Jerusalem skal byggjast opp att. Lat oss så få vita kva som er kongens vilje i denne saka.