Read nynorsk 1978 Esra 6 Bible Online

Esra 6 - nynorsk 1978 bible

Esra 6

¹Då sette kong Dareios nokre menn til å sjå etter i arkiva i skattkammera i Babylonia.

²I kongsborga i Ekbatana, hovudstaden i provinsen Media, fann dei ein bokrull, og der stod det skrive: Kunngjering. [8]

³I det fyrste året kong Kyros styrte, gav han dette påbodet om Guds hus i Jerusalem: Huset skal byggjast opp att, så det vert ein stad der folk ber fram offer. Grunnvollen skal leggjast på nytt. Sjølve templet skal vera seksti alner høgt og seksti alner breitt.

⁴Det skal byggjast med tre lag tilhogne steinar og kledast innvendig med eitt lag tre. Utgiftene skal berast av kongens skattkammer.

⁵Gullkara og sølvkara som høyrde Guds hus til, og som Nebukadnesar tok ut or templet i Jerusalem og førte til Babylon, skal gjevast tilbake. Dei skal førast til Jerusalem og setjast på sin rette stad i templet der.

⁶«No skal du, Tattenai, statthaldar i provinsen vestanfor Eufrat, og du Sjetar-Bosnai og embetsbrørne dykkar, embetsmennene i provinsen, halda dykk borte frå Jerusalem.

⁷Legg ikkje hindringar i vegen for arbeidet på dette Guds hus! Lat statthaldaren og dei eldste hjå jødane få byggja opp att templet på den gamle staden.

⁸Eg gjev no påbod om kva de skal gjera for desse eldste hjå jødane, så bygginga kan halda fram: Av dei skatteinntektene som kongen har i provinsen, skal de fullt ut dekkja utgiftene for desse mennene, så arbeidet ikkje stansar.

⁹Alt det som trengst av unge oksar, verar og lam til brennoffer for Gud i himmelen, skal kvar dag gjevast etter oppgåve frå prestane i Jerusalem. Det same gjeld kveite, salt, vin og olje.

¹⁰Så skal dei bera fram velluktande offergåver for Gud i himmelen og be om eit langt liv for kongen og sønene hans.

¹¹Dette påbodet gjev eg òg: Kvar den som krenkjer denne føresegna, skal få ein bjelke riven ut or huset sitt; den skal han hengjast opp på og naglast fast til. Huset hans skal gjerast til ein skraphaug, fordi han bar seg såleis åt.

¹²Gjev så at den Gud som har late namnet sitt bu i templet, må slå ned alle kongar og folk som krenkjer denne føresegna og vil øydeleggja Guds hus i Jerusalem. Eg, Dareios, gjev dette påbodet, og det skal fylgjast fullt ut.»

¹³Tattenai, statthaldaren i provinsen vestanfor Eufrat, og Sjetar-Bosnai og embetsbrørne deira gjorde då i alle måtar så som kong Dareios hadde gjeve påbod om.

¹⁴Dei eldste mellom jødane heldt fram med bygginga og hadde god framgang, medan profeten Haggai og Sakarja, soneson til Iddo, sette mot i dei med profetorda sine. Dei fullførte arbeidet så som Israels Gud hadde sagt, og etter føresegn frå persarkongane Kyros, Dareios og Artaxerxes.

¹⁵Templet stod ferdig den tredje dagen i adar månad i det sjette året Dareios var konge.

¹⁶Israelittane — prestane, levittane og alle dei andre som var komne heim att or fangenskapet — heldt då høgtid og vigde Guds hus med stor glede.

¹⁷I tempelvigsla ofra dei 100 oksar, 200 verar og 400 lam. Som syndoffer for heile Israel bar dei fram tolv bukkar, ein for kvar av dei tolv Israels-ættene.

¹⁸Dei delte prestane inn i skift og levittane i avdelingar; dei skulle syta for gudstenesta i Jerusalem, så som føreskrive er i Moseboka.

¹⁹Den fjortande dagen i den fyrste månaden heldt dei heimkomne påskehelg.

²⁰Levittane hadde då reinsa seg og var reine alle som ein. Dei slakta påskelammet for alle dei heimkomne, for brørne sine, prestane, og for seg sjølve.

²¹Så åt israelittane påskelammet, både dei som var komne heim or fangenskapet, og alle som hadde skilt seg frå folket i landet og ureinskapen deira fordi dei ville tilbe Herren, Israels Gud, saman med dei andre.

²²I sju dagar heldt israelittane usyrdebrødshelga. Gleda var stor; for Herren hadde gjort dei glade då han vekte assyrarkongens velvilje, så kongen stødde dei i arbeidet på templet åt Israels Gud. [9]