Read nynorsk 1978 Nehemja 6 Bible Online

Nehemja 6 - nynorsk 1978 bible

Nehemja 6

¹Sanballat, Tobia, arabaren Gesjem og dei andre fiendane våre fekk høyra at eg hadde bygt opp att muren, og at det ikkje fanst nokon brest i han meir — berre at eg til den tid ikkje hadde sett inn dører i portane.

²Då sende Sanballat og Gesjem bod til meg og bad meg koma til eit møte med dei i Hakkefirim i Ono-dalen. Men dei tenkte berre på å skada meg. [8]

³Eg sende nokre menn til dei og svara: «Eg held på med eit stort arbeid og kan ikkje koma. Arbeidet ville stogga dersom eg gjekk frå det og drog ned til dykk.»

⁴Fire gonger sende dei same bodet til meg, og kvar gong gav eg same svaret.

⁵Femte gongen sende Sanballat meg eit liknande bod. Men no hadde tenaren hans eit ope brev med seg.

⁶Der stod det skrive: «Det går ord mellom folka, og Gesjem stadfester det, at du og jødane tenkjer på å gjera opprør, og at det er difor du byggjer opp att muren. Det seiest at du vil verta kongen deira.

⁷Du skal jamvel ha sett nokre profetar til å ropa ut i Jerusalem at du er konge i Judea. Dette får nok kongen snart høyra. Så kom då og lat oss samrådast!»

⁸Men eg sende dette svaret til Sanballat: «Det har ikkje hendt noko slikt som det du talar om. Det er noko du har funne på sjølv.»

⁹For dei la seg alle ut om å skræma oss. Dei tenkte at vi då ville verta trøytte og halda opp med arbeidet, så det ikkje vart fullført. Men eg heldt ihuga fram med arbeidet.

¹⁰Ein dag kom eg til Sjemaja, son til Delaja og soneson til Mehetabel; for han måtte halda seg heime i huset sitt. Då sa han: «Lat oss gå saman til Guds hus, inn i tempelhalla, og lat oss stengja dørene der! For dei kjem og vil drepa deg; i denne natt kjem dei og vil drepa deg.»

¹¹Men eg svara: «Skulle ein mann som eg røma? Og korleis kunne ein mann som eg gå inn i templet utan å missa livet? Nei, eg går ikkje dit.»

¹²For eg skjøna at det ikkje var Gud som hadde sendt han, men at han bar fram denne spådomen om meg fordi Tobia og Sanballat hadde leigt han til det.

¹³Han hadde fått betaling for å skræma meg til å gjera som han sa, og dermed synda. Så kunne dei få sett eit uord på meg og spotta meg. —

¹⁴Min Gud, kom i hug kva Tobia og Sanballat har gjort, og at profetkvinna Noadja og dei andre profetane la seg ut om å skræma meg.

¹⁵Femtito dagar etter at vi tok til med arbeidet, stod muren ferdig, den tjuefemte dagen i elul månad.

¹⁶Då alle fiendane våre fekk høyra det, og alle folka som budde ikring oss, fekk sjå det, då seig dei mykje i eigen vørdnad, og dei skjøna at arbeidet var gjort med hjelp frå vår Gud.

¹⁷På den tid skreiv òg stormennene i Judea ei mengd med brev som gjekk til Tobia, og dei fekk brev att frå han.

¹⁸For mange menn i Judea hadde svore han truskap. Sjølv var han verson til Sjekanja, son til Arak, og Johanan, son hans, hadde gift seg med dotter til Mesjullam, son til Berekja.

¹⁹Dei tala til meg om kor mykje godt det var med han, og alt det eg sa, bar dei attende til han. Tobia sende òg brev for å skræma meg.