Read nynorsk 1978 2. Mosebok 19 Bible Online

2. Mosebok 19 - nynorsk 1978 bible

2. Mosebok 19

¹Den tredje nymånedagen etter at israelittane hadde fare frå Egypt, kom dei til Sinai-øydemarka. [30]

²Dit kom dei etter at dei hadde teke ut frå Refidim, og dei slo leir der i villmarka. Israelittane leira seg midt for fjellet,

³og Moses steig opp til Gud. Då ropa Herren til han frå fjellet: «Dette skal du seia til Jakobs-ætta og kunngjera for Israels-folket:

⁴De har sett kva eg gjorde med egyptarane, og korleis eg lyfte dykk på ørnevenger og bar dykk hit til meg.

⁵Vil de no lyda vel etter orda mine og halda pakta mi, så skal de vera min eigedom framfor alle andre folk; for heile jorda er mi.

⁶De skal vera eit kongerike av prestar og eit heilagt folk for meg. Desse orda skal du tala til israelittane.»

⁷Då Moses kom ned att, kalla han saman dei eldste i folket og bar fram dei orda Herren hadde sendt han med.

⁸Og folket svara, alle som ein: «Alt det Herren har sagt, skal vi gjera.» Dette svaret bar Moses attende til Herren.

⁹Då sa Herren til Moses: «Eg vil koma til deg i ei tett sky, så folket kan høyra at eg talar med deg, og tru på deg alle dagar.» Då Moses hadde sagt Herren kva folket svara,

¹⁰sa Herren til han: «Gå til folket og sei at dei skal helga seg i dag og i morgon! Lat dei vaska kleda sine

¹¹og halda seg ferdige tredje dagen! For då vil Herren stiga ned på Sinai-fjellet medan heile folket ser på.

¹²Og du skal merkja av eit område for folket og seia: Ta dykk i vare, så de ikkje går opp på fjellet! Kom ikkje innåt det! Kvar den som kjem innåt fjellet, skal døy.

¹³Ingen må ta si hand i han. Han skal steinast eller skytast. Anten det er eit dyr eller eit menneske, skal det lata livet. Når hornet ljomar, skal dei stiga opp på fjellet.»

¹⁴Så gjekk Moses ned av fjellet til folket og lét dei helga seg, og dei vaska kleda sine.

¹⁵Og han sa til folket: «Tredje dagen skal de halda dykk ferdige. Kom ikkje nær kvinner!»

¹⁶Då det vart morgon tredje dagen, bar det laust med torebrak og lyn. Det la seg ei tung sky over fjellet, og det lydde ein sterk hornlåt. Alle som var i leiren, skalv av redsle.

¹⁷Men Moses førte folket ut or leiren til møtes med Gud, og dei vart ståande nedunder fjellet.

¹⁸Heile Sinai-fjellet stod i røyk, av di Herren hadde kome ned på det i eld. Røyken steig opp som or ein smelteomn, og heile fjellet dirra og skalv.

¹⁹Hornlåten auka og vart sterkare og sterkare. Moses tala, og Gud svara så det kunne høyrast.

²⁰Då Herren hadde stige ned på Sinai-fjellet, på øvste tinden, kalla han Moses opp på fjelltoppen, og han gjekk opp.

²¹Herren sa til Moses: «Gå ned og åtvar folket, så dei ikkje trengjer seg fram til Herren og vil sjå! For då kjem mange av dei til å missa livet.

²²Jamvel prestane, som elles får stiga fram for Herren, må helga seg, så Herren ikkje skal bryta inn mellom dei.»

²³Då sa Moses til Herren: «Folket kan ikkje stiga opp på Sinai-fjellet, for du har sjølv åtvara oss og sagt: Merk av ei grense kring fjellet og lys det heilagt!»

²⁴Og Herren sa til han: «Gå ned, og kom så opp att, du og Aron! Men prestane og folket må ikkje trengja seg fram og stiga opp til Herren, for då bryt han inn mellom dei.»

²⁵Då gjekk Moses ned til folket og sa det til dei.