Read nynorsk 1978 2. Mosebok 21 Bible Online

2. Mosebok 21 - nynorsk 1978 bible

2. Mosebok 21

¹Dette er dei lovene du skal leggja fram for israelittane:

²Når du kjøper ein hebraisk træl, skal han tena seks år. Men i det sjuande året skal han gjevast fri utan vederlag.

³Er han einsleg når han kjem, skal han fara sin veg einsleg. Er han gift når han kjem, skal kona hans vera med han når han fer.

⁴Har han fått ei kone av husbonden sin og får søner eller døtrer med henne, skal kona og borna høyra husbonden hennar til, og han skal fara sin veg åleine.

⁵Men seier trælen: «Eg held av husbonden min og kona mi og borna mine, eg vil ikkje vera fri»,

⁶då skal husbonden føra han fram for Gud og leia han bort til døra eller dørstolpen, og husbonden skal stikka ein syl gjennom øyra hans. Så skal han vera trælen hans all si tid. [32] [33]

⁷Når ein mann sel dotter si til trælkvinne, skal ho ikkje gjevast fri liksom trælane.

⁸Har husbonden sett henne ut åt seg sjølv og så ikkje likar henne, skal han la henne kjøpast fri. Han har ikkje rett til å selja henne til utlendingar, sidan han har vore trulaus mot henne.

⁹Men har han sett henne ut åt son sin, skal han gje henne same retten som døtrer har.

¹⁰Får sonen endå ei kone, skal han ikkje la den fyrste vanta mat, klede eller ekteskapeleg omgang.

¹¹Dersom han ikkje lèt henne få desse tre tinga, skal ho gjevast fri utan vederlag, utan betaling.

¹²Den som slår til ein mann så han døyr, skal lata livet.

¹³Men har han ikkje stått mannen etter livet, og er det Gud som har late han falla for hans hand, så skal eg fastsetja ein stad han kan røma til.

¹⁴Når ein mann gjer ein slik udåd at han drep nesten sin med svik, skal du ta han, om det så er frå altaret mitt; han skal døy.

¹⁵Den som slår far sin eller mor si, skal døy.

¹⁶Den som stel eit menneske, skal døy, anten han sel det eller det finst hjå han.

¹⁷Den som forbannar far sin eller mor si, skal døy.

¹⁸Når to menn trettar, og den eine slår den andre med ein stein eller med neven, så han vert sengeliggjande, men ikkje døyr,

¹⁹då skal gjerningsmannen sleppa straff dersom hin kjem opp att og kan gå ute med stav. Han skal berre halda han skadelaus for den tida han har tapt, og kosta full lækjedom på han.

²⁰Når ein mann slår trælen sin — eller trælkvinna si — med staven sin så han døyr for hans hand, då skal mannen straffast.

²¹Men lever trælen ein dag eller to, skal han ikkje straffast; for trælen er hans eigedom.

²²Når to menn slåst, og dei støyter til ei kvinne som er med barn, så ho misser fosteret, utan at det elles hender noka ulukke, då skal gjerningsmannen svara den skadebota som mannen hennar legg på han, og det skal gjerast hjå domarane.

²³Men hender det ei ulukke, skal du bøta liv for liv,

²⁴auga for auga, tann for tann, hand for hand, fot for fot,

²⁵brannsår for brannsår, sår for sår, flengje for flengje.

²⁶Når ein mann slår trælen sin eller trælkvinna si i auga og skamfer det, skal han til vederlag for auga gje dei fri.

²⁷Slår han ut ei tann på trælen sin eller trælkvinna si, skal han til vederlag for tanna gje dei fri.

²⁸Når ein okse stangar i hel ein mann eller ei kvinne, skal oksen steinast, og kjøtet må ikkje etast. Men eigaren skal sleppa straff.

²⁹Men var oksen olm på førehand, og eigaren ikkje såg etter han, endå han hadde vorte åtvara, og han så drep ein mann eller ei kvinne, då skal oksen steinast, og eigaren skal òg døy.

³⁰Vert han ilagd ei bot, skal han betala så mykje i løysepengar for livet sitt som dei krev av han.

³¹Er det ein gut eller ei jente oksen stangar, skal dei fara fram etter same lova.

³²Er det ein træl eller ei trælkvinne oksen stangar, skal eigaren gje husbonden deira tretti sekel sølv, og oksen skal steinast.

³³Når ein mann lèt ein brunn stå open, eller grev ein brunn og ikkje tekkjer over, og ein okse eller eit esel dett nedi,

³⁴då skal den som eig brunnen, gje vederlag for det; han skal gje pengar til den som åtte dyret, men det daude dyret skal vera hans.

³⁵Når oksen åt ein mann stangar i hel oksen åt ein annan, skal dei selja den levande oksen og dela pengane, og det daude dyret skal dei òg dela.

³⁶Men var det kjent at oksen var olm på førehand, og eigaren likevel ikkje såg etter han, då skal han gje ein annan okse til vederlag, og det daude dyret skal vera hans.