Read nynorsk 1978 2. Mosebok 24 Bible Online

2. Mosebok 24 - nynorsk 1978 bible

2. Mosebok 24

¹Gud sa til Moses: «Stig opp til Herren, du og Aron, Nadab og Abihu og sytti av dei eldste i Israel! Og bøy dykk til jorda og tilbed, medan de enno er langt borte!

²Berre Moses skal gå fram til Herren. Dei andre må ikkje gå fram, og folket får ikkje stiga opp saman med han.»

³Då Moses kom og bar fram for folket alle Herrens bod og alle lovene, svara dei samrøystes: «Alle dei bod Herren har gjeve oss, vil vi halda.»

⁴Så skreiv Moses opp alle dei orda Herren hadde tala. Morgonen etter stod han tidleg opp og bygde eit altar tett attmed fjellet og reiste tolv minnesteinar for dei tolv Israels-ættene.

⁵Sidan sende han ut nokre unge israelittar. Dei bar fram brennoffer og slakta oksar til måltidsoffer for Herren.

⁶Moses tok halvparten av blodet og hadde det i skålene; den andre halvparten skvette han på altaret.

⁷Så tok han paktboka og las opp for folket, og dei sa: «Vi vil vera lydige og gjera alt det Herren har sagt.» [40]

⁸Då tok Moses blodet, skvette det på folket og sa: «Sjå, dette er blodet til den pakta som Herren gjer med dykk, og som er grunna på alle desse orda.»

⁹Så gjekk dei opp på fjellet, Moses og Aron, Nadab og Abihu og sytti av dei eldste i Israel.

¹⁰Og dei såg Israels Gud. Under føtene hans var det som eit golv av safirheller, klåre som himmelen sjølv.

¹¹Men han lyfte ikkje handa mot Israels gjævaste menn. Dei skoda Gud, og dei åt og drakk.

¹²Sidan sa Herren til Moses: «Kom opp på fjellet til meg og ver her ei stund, så skal eg gje deg steintavlene med lova og boda, som eg har skrive opp til rettleiing for folket!»

¹³Då gjekk Moses i veg med Josva, tenaren sin. Og Moses steig opp på Guds-fjellet.

¹⁴Han sa til dei eldste: «Ver her og venta på oss til vi kjem att! Her er Aron og Hur; dei skal vera hjå dykk. Er det nokon som har ei sak, kan han gå til dei.»

¹⁵Så steig Moses opp på fjellet. Då la skya seg tett ikring nuten,

¹⁶og Herrens herlegdom kom ned og heldt seg på Sinai-fjellet. Skya gøymde fjellet i seks dagar. Den sjuande dagen ropa Herren på Moses ut or skya.

¹⁷Herrens herlegdom var å sjå til for israelittane som ein øydande eld på fjelltoppen.

¹⁸Så gjekk Moses inn i skya og steig opp på fjellet, og han var på fjellet i førti dagar og førti netter.