Read nynorsk 1978 2. Mosebok 25 Bible Online

2. Mosebok 25 - nynorsk 1978 bible

2. Mosebok 25

¹Herren tala til Moses og sa:

²Sei til israelittane at dei skal koma med gåver til meg! Av kvar den som kjenner trong til det, skal de ta imot ei gåve til meg.

³Dette er gåvene som de skal ta imot av dei: gull, sølv og bronse,

⁴fiolett, purpurraud og karmosinraud ull, fint lingarn og geiteragg,

⁵raudleta verskinn, delfinskinn og akasietre,

⁶olje til ljosestaken, balsam til salvingsoljen og til den velluktande røykjelsen,

⁷karneol og andre dyre steinar til å setja på efoden og brystduken. [41]

⁸Og lat dei reisa ein heilagdom åt meg, så skal eg bu midt imellom dei.

⁹Denne bustaden og alt det som høyrer til i han, skal de i alle måtar laga etter det førebiletet eg vil syna deg.

¹⁰Du skal laga ei kiste av akasietre, to og ei halv alen lang, halvanna alen brei og halvanna alen høg.

¹¹Kled henne med reint gull både innvendes og utvendes, og set ein gullkant ikring henne!

¹²Støyp fire gullringar og fest dei i dei fire føtene på kista, to på kvar side!

¹³Lag så stenger av akasietre, kled dei med gull,

¹⁴og smøy dei inn i ringane på sidene av kista! Desse stengene skal de bera henne med.

¹⁵Dei skal støtt vera i ringane på kista; dei må aldri takast or.

¹⁶I kista skal du leggja lova som eg vil gje deg.

¹⁷Så skal du laga til ein soningsstad; han skal vera av reint gull, to og ei halv alen lang og halvanna alen brei. [42]

¹⁸På endane av soningsstaden skal du setja to kjerubar som du har laga av hamra gull,

¹⁹ein kjerub på den eine sida og ein på den andre. Du skal laga dei så at dei går i eitt med endane på soningsstaden.

²⁰Kjerubane skal halda vengene utbreidde og lyfte, så dei tekkjer over og vernar soningsstaden med vengene sine. Dei skal vera vende mot kvarandre, med andletet ned mot soningsstaden.

²¹Så skal du setja soningsstaden opp på kista, og i kista skal du leggja lova som eg vil gje deg.

²²Der vil eg møtast med deg. Alt det eg byd deg å tala til israelittane, vil eg seia deg frå soningsstaden mellom dei to kjerubane som er over lovkista.

²³Du skal laga eit bord av akasietre. Det skal vera to alner langt, ei alen breitt og halvanna alen høgt.

²⁴Kled det med reint gull og set ein gullkant på det som går heilt ikring.

²⁵Så skal du laga ei list på bordet. Ho skal vera brei som ei hand og gå heilt ikring. Rundt lista skal du laga ein gullkant.

²⁶Lag så fire gullringar og set dei i dei fire hjørna på dei fire føtene!

²⁷Tett attmed lista skal ringane sitja. Dei skal vera til å smøya berestenger inn i.

²⁸Stengene skal du laga av akasietre og kle dei med gull. Med dei skal bordet berast.

²⁹Sidan skal du laga dei fata og skålene som høyrer bordet til, og kannene og bollane til drikkofferet. Av reint gull skal du laga dei.

³⁰På bordet skal du støtt leggja fram skodebrød for mitt åsyn.

³¹Så skal du laga ein ljosestake av reint gull. Han skal vera hamra arbeid, både foten og sjølve staken. Skålene på staken og knuppane og blomane skal gå i eitt med han.

³²Seks armar skal gå ut frå ljosestaken, tre på den eine sida og tre på den andre.

³³På den eine armen skal det vera tre beger med knuppar og blomar og på den andre tre beger med knuppar og blomar. Begera skal vera på skap som ein mandelblom. Såleis skal det vera på alle dei seks armane som går ut frå ljosestaken.

³⁴På sjølve staken skal det vera fire beger med knuppar og blomar. Dei skal vera på skap som ein mandelblom.

³⁵Det skal vera ein knupp under det fyrste armparet, ein under det andre og ein under det tredje. Knuppane skal gå i eitt med staken. Det skal vera ein knupp under kvart par av dei seks armane som går ut frå ljosestaken.

³⁶Knuppane og armane skal gå i eitt med staken. Heile ljosestaken skal vera eitt einaste stykke hamra arbeid av reint gull.

³⁷Du skal laga sju lamper til ljosestaken. Dei skal du setja såleis opp at dei kastar ljoset beint fram for staken.

³⁸Ljosesaksene og pannene som høyrer til, skal vera av reint gull.

³⁹Ein talent reint gull skal du bruka til ljosestaken og alle desse reiskapane.

⁴⁰Sjå til at du gjer arbeidet etter det førebiletet som vart synt deg på fjellet!