Read nynorsk 1978 2. Mosebok 26 Bible Online

2. Mosebok 26 - nynorsk 1978 bible

2. Mosebok 26

¹Heilagdomen skal du laga av ti teltdukar. Dei skal vera av fint, tvinna lingarn og fiolett, purpurraud og karmosinraud ull. I dukane skal du veva inn kjerubar i kunstvevnad.

²Kvar duk skal vera tjueåtte alner lang og fire alner brei. Alle dukane skal halda same målet.

³Fem av dukane skal skøytast i hop til eitt stykke, og like eins dei andre fem dukane.

⁴I kanten av den duken som er ytst på det eine ihopskøytte stykket, skal du laga hemper av fiolett ull, og like eins i kanten av den ytste duken på det andre stykket.

⁵Femti hemper skal du laga på den eine duken, og femti hemper i kanten av den som høyrer til det andre stykket. Hempene skal sitja midt for kvarandre.

⁶Og du skal laga femti gullkrokar. Med dei skal du hekta dukane saman, så det vert éin teltheilagdom av dei.

⁷Du skal veva dukar av geiteragg til tak over teltet. Elleve slike dukar skal du veva.

⁸Kvar duk skal vera tretti alner lang og fire alner brei. Alle dei elleve dukane skal halda same målet.

⁹Fem av dukane skal du skøyta i hop for seg, og seks for seg. Den sjette duken, som kjem til å liggja over framsida på teltet, skal du leggja dobbelt.

¹⁰I kanten av den duken som er ytst på det eine ihopskøytte stykket, skal du laga femti hemper, og i kanten av det andre stykket femti hemper.

¹¹Og du skal laga femti krokar av bronse og hekta dei i hempene. Såleis skal du festa dei to stykka til kvarandre, så det vert eitt telttak av dei.

¹²Den delen som går av på teltdukane, den halve duken som vert att, skal hanga ned på baksida av heilagdomen.

¹³Og den eine alna som teltdukane er for lange på kvar ende, skal hengjast ned etter begge sideveggene til livd for heilagdomen.

¹⁴Over telttaket skal du laga eit dekke av raudleta verskinn, og ovanpå det eit dekke av delfinskinn.

¹⁵Plankane til heilagdomen skal du laga av akasietre. Dei skal reisast på ende.

¹⁶Kvar planke skal vera ti alner lang og halvanna alen brei.

¹⁷På kvar planke skal det vera to tappar med ei tverrlist imellom. Såleis skal du laga alle plankane i heilagdomen.

¹⁸Tjue av dei plankane du lagar, skal stå på den sida som vender mot sør.

¹⁹Til dei tjue plankane skal du laga førti fotstykke av sølv, to fotstykke under kvar planke, så dei to tappane kan festast i dei.

²⁰På den andre sida av heilagdomen, på nordsida, skal det òg vera tjue plankar

²¹med førti fotstykke av sølv, to under kvar planke.

²²Til baksida av heilagdomen, mot vest, skal du laga seks plankar.

²³Og til kvart hjørne på same sida skal du laga to plankar.

²⁴Dei skal vera doble nedst, og like eins øvst, ned til den fyrste ringen. Så skal dei vera, dei to plankane som skal stå i kvart av dei to hjørna.

²⁵Såleis vert det åtte plankar og seksten fotstykke av sølv, to til kvar planke.

²⁶Du skal laga tverrstenger av akasietre, fem til plankane på den eine sida av heilagdomen,

²⁷fem til plankane på den andre sida og fem til plankane på baksida av heilagdomen, mot vest.

²⁸Midtstonga, den som er midt på plankeveggen, skal gå tvert over, frå ende til ende.

²⁹Plankane skal du kle med gull, og ringane på dei, som tverrstengene skal smøyast inn i, skal du laga av gull. Tverrstengene skal du òg kle med gull.

³⁰Så skal du reisa heilagdomen på rett måte, så som det vart synt deg på fjellet.

³¹Du skal laga eit forheng av fiolett, purpurraud og karmosinraud ull og fint, tvinna lingarn. I forhenget skal det vevast inn kjerubar i kunstvevnad.

³²Du skal hengja det opp på fire gullkledde akasiestolpar som det er gullhakar på, og som står på fire fotstykke av sølv.

³³Rett under krokane skal du hengja det, og innanfor forhenget skal du setja lovkista. Forhenget skal vera ein skiljevegg mellom Det heilage og Det høgheilage.

³⁴På lovkista i Det høgheilage skal du setja soningsstaden.

³⁵Bordet skal du setja utanfor forhenget, og ljosestaken ved sørveggen i heilagdomen, midt for bordet, som skal stå ved nordveggen.

³⁶Til teltdøra skal du laga eit teppe av fiolett, purpurraud og karmosinraud ull og fint, tvinna lingarn, vove i mange leter.

³⁷Til teppet skal du laga fem akasiestolpar og kle dei med gull. På stolpane skal det vera gullhakar, og du skal støypa fem fotstykke av bronse til dei.