Read nynorsk 1978 2. Mosebok 28 Bible Online

2. Mosebok 28 - nynorsk 1978 bible

2. Mosebok 28

¹Du skal kalla Aron, bror din, og sønene hans fram or Israels-lyden og setja dei til prestar for meg — Aron og sønene hans, Nadab, Abihu, Elasar og Itamar.

²Og du skal laga heilage klede åt Aron, bror din, til ære og prydnad.

³Sei til alle som skjønar seg på kunst, alle som eg har fylt med kunstnarånd, at dei skal laga den kledebunaden som Aron skal ha på seg når han vert vigd til å vera prest for meg.

⁴Desse kleda skal dei laga: brystduk, efod, kappe, rutet kjortel, hue og belte. Det er den heilage kledebunaden som dei skal laga til Aron, bror din, og sønene hans, så dei kan vera prestar for meg.

⁵Til det skal dei bruka gulltråd, fiolett, purpurraud og karmosinraud ull og fint lingarn.

⁶Efoden skal dei laga av gulltråd, fiolett, purpurraud og karmosinraud ull og fint, tvinna lingarn. Han skal vera i kunstvevnad.

⁷Efoden skal ha to aksleband som er feste i hjørna og held han i hop.

⁸Beltet som han skal spennast fast med, skal vevast på same måten som efoden og i eitt med han. Det skal vera av gull, fiolett, purpurraud og karmosinraud ull og fint, tvinna lingarn.

⁹Du skal ta to karneol-steinar, og på dei skal du grava inn namna åt Israels-sønene,

¹⁰seks namn på den eine steinen, og dei andre seks på den andre steinen, etter alderen.

¹¹På same måten som ein ritar inn i stein eller grev inn i eit signet, skal du grava inn namna åt Israels-sønene på desse to steinane. Og du skal setja dei i flettverk av gulltråd.

¹²Begge steinane skal du setja på akslebanda åt efoden. Dei skal minna om Israels-sønene. Når Aron står for Herrens åsyn, skal han bera namna deira på begge akslene sine og såleis minna om dei.

¹³Du skal laga flettverk av gulltråd

¹⁴og to kjeder av reint gull. Dei skal vera tvinna som ein tvinnar snorer. Desse kjedene skal du festa til flettverka.

¹⁵Du skal laga ein brystduk til domsavgjerder. Han skal vera i kunstvevnad og vevast på same måten som efoden. Av gulltråd, fiolett, purpurraud og karmosinraud ull og fint, tvinna lingarn skal du laga han.

¹⁶Brystduken skal vera firkanta og tvilagd, ei spann lang og ei spann brei.

¹⁷Du skal setja fire rader med innfelte steinar på han. I den eine rada skal det vera ein rubin, ein topas og ein smaragd,

¹⁸i den andre rada ein turkis, ein safir og ein diamant,

¹⁹i den tredje rada ein opal, ein agat og ein ametyst,

²⁰og i den fjerde rada ein krysolitt, ein karneol og ein jade. Dei skal setjast inn i flettverk av gulltråd.

²¹Steinane skal vera tolv i talet, etter namna på Israels-sønene, ein for kvart namn. På kvar stein skal namnet åt ei av dei tolv ættene vera inngrave liksom på eit signet.

²²Til brystduken skal du laga kjeder av reint gull. Dei skal vera tvinna som ein tvinnar snorer.

²³Like eins skal du laga to gullringar til brystduken. Dei skal du setja i kvar sitt hjørne på han.

²⁴Dei to gullsnorene skal du festa i dei to ringane på hjørna av brystduken.

²⁵Dei andre to endane av gullsnorene skal du festa i dei to flettverka, og dei skal du setja på akslebanda åt efoden, på framsida.

²⁶Så skal du laga to gullringar til. Dei skal du setja i dei andre to hjørna av brystduken, på den sida som vender inn mot efoden.

²⁷Endå to gullringar skal du laga. Dei skal du setja nedst på framsida av dei to akslebanda åt efoden, der dei er feste til efoden, ovanfor beltet.

²⁸Ringane på brystduken skal bindast til ringane på efoden med ei snor av fiolett ull, så duken kjem til å sitja over beltet og ikkje vert skild frå efoden.

²⁹Når Aron går inn i heilagdomen, skal han bera namna åt Israels-sønene innmed hjarta sitt på brystduken til domsavgjerder. Såleis skal han alltid minna om dei for Herrens åsyn.

³⁰I brystduken skal du leggja urim og tummim. Dei skal liggja innmed hjarta åt Aron når han stig fram for Herren. Aron skal alltid bera domsavgjerda for Israels-sønene innmed hjarta sitt for Herrens åsyn.

³¹Kappa, som høyrer efoden til, skal du laga heilt igjennom av fiolett ull.

³²Midt på henne skal det vera ei halsopning med ei voven bord ikring, liksom rundt opninga i ei brynje, så ho ikkje skal rivna.

³³Nedst kring kappefalden skal du setja granateple av fiolett, purpurraud og karmosinraud ull, og mellom dei gullbjøller heilt ikring.

³⁴Fyrst skal det vera ei gullbjølle og eit granateple, så ei gullbjølle og eit granateple, og sameleis nedst rundt heile kappefalden.

³⁵Denne kappa skal Aron ha på seg kvar gong han gjer teneste, så det kan høyrast når han går inn i heilagdomen og stig fram for Herrens åsyn, og når han går ut att — så han ikkje skal døy.

³⁶Du skal laga ei plate av reint gull. I den skal du grava inn som i eit signet: «Helga til Herren.»

³⁷Du skal festa henne til ei snor av fiolett ull, og ho skal sitja på hua; framme på hua skal ho sitja.

³⁸Aron skal ha henne over panna si, så han kan bera den synda som heng ved dei heilage offera israelittane vier til Herren, ved alle dei heilage gåvene dei ber fram. Ho skal alltid sitja over panna hans, så gåvene kan vera til hugnad for Herren.

³⁹Du skal veva ein rutet kjortel av fint lin og laga ei hue av fint lin og eit belte i mange leter.

⁴⁰Til Arons-sønene òg skal du laga kjortlar, og du skal laga belte og høge huer til dei, til ære og prydnad.

⁴¹Dette skal du ha på Aron, bror din, og sønene hans. Og du skal salva dei, setja dei inn og via dei, så dei kan gjera presteteneste for meg.

⁴²Lag lerretsbukser til dei! Dei skal løyna den nakne kroppen deira frå hoftene og ned på låra.

⁴³Dei skal Aron og sønene hans ha på seg når dei går inn i møteteltet eller stig fram til altaret og skal gjera teneste i heilagdomen. Elles fører dei skuld over seg og må døy. Det skal vera ei evig lov for han og etterkomarane hans.