Read nynorsk 1978 2. Mosebok 31 Bible Online

2. Mosebok 31 - nynorsk 1978 bible

2. Mosebok 31

¹Herren sa til Moses:

²Eg har kalla Besalel, son til Uri Hursson, av Juda-ætta

³og fylt han med ånd frå Gud, med visdom, skjøn og kunnskap og med evne til alle slag handverk,

⁴så han kan tenkja ut og laga kunstverk i gull, sølv og bronse,

⁵slipa steinar som skal fellast inn, skjera ut i tre og gjera alle slag handverksarbeid.

⁶Til hjelpesmann har eg gjeve han Oholiab, son til Akisamak, av Dans-ætta. Og alle som har slike givnader, har eg gjeve evne, så dei kan laga alt det eg har sagt deg:

⁷møteteltet, paktkista, soningsstaden over henne og alt som høyrer teltet til,

⁸bordet med det som høyrer til, gull-ljosestaken med alt som høyrer til, røykjelsesaltaret,

⁹brennofferaltaret med alt som høyrer til, vaskekaret med fotstykke,

¹⁰embetsskrudet og den heilage kledebunaden åt Aron, presten, og kleda åt sønene hans til prestetenesta,

¹¹salvingsoljen og den velluktande røykjelsen til heilagdomen. Dei skal i eitt og alt gjera som eg har sagt deg.

¹²Herren sa til Moses:

¹³Sei til israelittane: Sabbatsdagane mine skal de halda; for sabbaten er eit teikn på pakta mellom meg og dykk frå ætt til ætt, så de skal vita at det er eg, Herren, som helgar dykk.

¹⁴De skal halda sabbaten; han skal vera heilag for dykk. Den som vanhelgar sabbaten, skal døy. Kvar den som då gjer noko arbeid, han skal rydjast ut or folket sitt.

¹⁵Seks dagar skal de arbeida, men den sjuande dagen skal vera sabbat, heilag sabbat for Herren. Kvar den som gjer noko arbeid på sabbatsdagen, skal døy.

¹⁶Israelittane skal akta på sabbaten, så dei held han i ætt etter ætt. Det skal vera ei evig pakt.

¹⁷Han skal vera eit teikn på pakta mellom meg og israelittane til evig tid. For på seks dagar skapte Herren himmelen og jorda, men den sjuande dagen kvilte han og heldt seg i ro.

¹⁸Då Herren var ferdig med å tala til Moses på Sinai-fjellet, gav han honom to lovtavler, steintavler som Gud hadde skrive på med fingeren sin.