Read nynorsk 1978 2. Mosebok 38 Bible Online

2. Mosebok 38 - nynorsk 1978 bible

2. Mosebok 38

¹Brennofferaltaret laga han av akasietre. Det var fem alner langt, fem alner breitt, firkanta og tre alner høgt.

²På kvart av dei fire hjørna laga han eit horn, og horna gjekk i eitt med altaret. Han kledde det med bronse.

³Så laga han alle dei reiskapane som høyrde altaret til, fata, eldskuflene, offerskålene, kjøtgaflane og glopannene. Alle desse reiskapane laga han av bronse.

⁴Han laga òg eit fletta gitter av bronse til altaret og sette det nedst, under altarlista, så det nådde midt opp på altaret.

⁵Og han støypte fire ringar til dei fire hjørna av bronsegitteret til å smøya stenger inn i.

⁶Stengene laga han av akasietre og kledde dei med bronse.

⁷Han smøygde dei inn i ringane på sidene av altaret, så det kunne berast. Altaret laga han av bord, og det var holt.

⁸Han laga vaskekaret og fotstykket av bronse. Til det bruka han speglane åt dei kvinnene som gjorde teneste innmed møteteltdøra. [49]

⁹Så laga han føregarden. På sørsida av føregarden laga han omheng av fint, tvinna lingarn, i ei lengd av hundre alner.

¹⁰Til dei var det tjue stolpar med fotstykke av bronse og hakar og stenger av sølv.

¹¹På nordsida laga han òg omheng, i ei lengd av hundre alner. Til dei var det tjue stolpar med fotstykke av bronse og hakar og stenger av sølv.

¹²På vestsida laga han omheng på femti alner. Til dei var det ti stolpar med fotstykke. Hakane på stolpane og stengene var av sølv.

¹³Framsida som vender mot aust, var femti alner.

¹⁴Der laga han femten alner omheng på den eine kanten, med tre stolpar og tre fotstykke,

¹⁵og på den andre kanten femten alner, med tre stolpar og tre fotstykke. Det var likt på begge sider av porten inn til føregarden.

¹⁶Alle omhenga kring føregarden var av fint, tvinna lingarn.

¹⁷Fotstykka til stolpane var av bronse, hakane og stengene til dei var av sølv, og stolpehovuda var kledde med sølv. Alle stolpane i føregarden var bundne i hop med sølvstenger.

¹⁸Teppet til føregardsporten var av fiolett, purpurraud og karmosinraud ull og fint, tvinna lingarn, vove i mange leter. Det var tjue alner langt og fem alner høgt etter breidda på veven, liksom omhenga kring føregarden.

¹⁹Til forhenget var det fire stolpar med fotstykke av bronse. Hakane var av sølv. Stolpehovuda var kledde med sølv, og stengene som høyrde til, var av sølv.

²⁰Alle pluggane til teltet og føregarden, heilt rundt, var av bronse.

²¹Her er rekneskapen for heilagdomen, bustaden åt lova. Moses baud levittane setja han opp, og Itamar, son til Aron, presten, hadde tilsyn med arbeidet. [50]

²²Besalel, son til Uri Hursson, av Juda-ætta, hadde gjort alt det som Herren hadde sagt til Moses,

²³og saman med han Oholiab, son til Akisamak, av Dans-ætta, som var ein meister i utskjering, kunstvevnad og mangleta vevnad med fiolett, purpurraudt og karmosinraudt ullgarn og fint lingarn.

²⁴Alt gullet som vart bruka til arbeidet med å gjera heilagdomen ferdig, og som var gjeve i offergåve, var 29 talentar og 730 sekel etter den vekt dei nyttar i heilagdomen.

²⁵Og sølvet som kom inn då dei heldt manntal over lyden, var 100 talentar og 1 775 sekel etter heilag vekt,

²⁶ein beka eller ein halv sekel etter heilag vekt for kvar einskild som kom med i manntalet, frå tjueårsalderen og oppetter, og det var 603 550 mann.

²⁷Dei hundre talentane med sølv vart bruka til å støypa fotstykka til heilagdomen og til forhenget, hundre talentar til hundre fotstykke, ein talent til kvart fotstykke.

²⁸Og dei 1 775 sekel bruka dei til hakane på stolpane, til å kle stolpehovuda og til stengene som skulle binda stolpane i hop.

²⁹Bronsen som vart gjeven i offergåve, var 70 talentar og 2 400 sekel.

³⁰Av den laga dei fotstykka til møteteltdøra og bronsealtaret med bronsegitteret som høyrde til, og alle reiskapane til altaret,

³¹fotstykka som skulle vera kring føregarden, føregardsporten, alle pluggane til teltet og alle pluggane til føregarden, heilt rundt.