Read nynorsk 1978 2. Mosebok 39 Bible Online

2. Mosebok 39 - nynorsk 1978 bible

2. Mosebok 39

¹Av den fiolette, purpurraude og karmosinraude ulla laga dei embetsskrudet til tenesta i heilagdomen. Dei laga dei heilage kleda til Aron, så som Herren hadde sagt Moses føre.

²Efoden laga dei av gull, fiolett, purpurraud og karmosinraud ull og fint, tvinna lingarn.

³Gullet hamra dei ut i plater og skar det opp til tråd, så det kunne vevast inn i det fiolette, purpurraude og karmosinraude ullgarnet og i det fine lingarnet, med kunstvevnad.

⁴Til efoden laga dei aksleband som var feste i hjørna og heldt han i hop.

⁵Beltet som han skulle spennast fast med, vov dei på same måten som efoden, og i eitt med han. Det var av gull, fiolett, purpurraud og karmosinraud ull og fint, tvinna lingarn, så som Herren hadde sagt Moses føre.

⁶Dei sette karneol-steinane inn i flettverk av gulltråd. På dei var namna åt Israels-sønene inngravne liksom på eit signet.

⁷Dei sette dei på akslebanda åt efoden, så dei skulle minna Herren om Israels-sønene, så som han hadde sagt Moses føre.

⁸Dei laga brystduken i kunstvevnad, på same måten som efoden. Han var av gulltråd, fiolett, purpurraud og karmosinraud ull og fint, tvinna lingarn.

⁹Brystduken var firkanta og tvilagd. Han var ei spann lang, ei spann brei og lagd dobbelt.

¹⁰Dei sette fire rader med steinar på han. I den eine rada var det ein rubin, ein topas og ein smaragd,

¹¹i den andre rada ein turkis, ein safir og ein diamant,

¹²i den tredje rada ein opal, ein agat og ein ametyst,

¹³og i den fjerde rada ein krysolitt, ein karneol og ein jade. Dei vart sette inn i flettverk av gulltråd.

¹⁴Steinane var tolv i talet, etter namna åt Israels-sønene, ein for kvart namn. På kvar stein var namnet på ei av dei tolv ættene inngrave liksom på eit signet.

¹⁵Til brystduken laga dei kjeder av reint gull. Dei var tvinna som ein tvinnar snorer.

¹⁶Like eins laga dei to flettverk av gulltråd og to ringar av gull. Ringane sette dei i kvar sitt hjørne av brystduken.

¹⁷Dei to gullsnorene feste dei i dei to ringane som sat i hjørna på duken.

¹⁸Dei andre to endane av gullsnorene feste dei i dei to flettverka, og flettverka sette dei på akslebanda åt efoden, på framsida.

¹⁹Så laga dei to gullringar til og sette dei i dei andre to hjørna på brystduken, på den sida som vender inn mot efoden.

²⁰Endå to gullringar laga dei og sette dei nedst på framsida av dei to akslebanda åt efoden, der dei var feste til efoden, ovanfor beltet.

²¹Ringane på brystduken batt dei til ringane på efoden med ei snor av fiolett ull, så duken kom til å sitja ovanfor beltet og ikkje var skild frå efoden. Dei gjorde alt så som Herren hadde sagt Moses føre.

²²Kappa som høyrer efoden til, laga dei heilt igjennom av fiolett ull. Ho var voven.

²³Midt på kappa var det ei halsopning som i ei brynje, og rundt opninga ei bord, så ho ikkje skulle rivna.

²⁴Nedst kring kappekanten sette dei granateple av tvinna fiolett, purpurraudt og karmosinraudt ullgarn.

²⁵Så laga dei bjøller av reint gull og sette dei mellom granatepla på kappefalden heilt ikring,

²⁶fyrst ei bjølle og eit granateple, så ei bjølle og eit granateple, og like eins rundt heile kanten av kappa som skulle brukast i gudstenesta, så som Herren hadde sagt Moses føre.

²⁷Til Aron og sønene hans laga dei òg kjortlane som var vovne av fint lin,

²⁸og huene og turbanane til å binda om hovudet, av fint lin, lerretsbuksene av fint, tvinna lingarn,

²⁹beltet som var vove i mange leter, av fint, tvinna lingarn og fiolett, purpurraud og karmosinraud ull, så som Herren hadde sagt Moses føre.

³⁰Dei laga panneplata, det heilage diademet, av reint gull. I den grov dei inn som i eit signet: «Helga til Herren».

³¹Dei sette ei snor av fiolett ull i plata og feste henne oppe på hua, så som Herren hadde sagt Moses føre.

³²Såleis vart det fullført, alt arbeidet med den heilage bustaden, med møteteltet. Israelittane gjorde det i eitt og alt så som Herren hadde sagt Moses føre.

³³Og dei gav heilagdomen over til Moses: teltet med alt som høyrde til, krokane, plankane, tverrstengene, stolpane, fotstykka,

³⁴dekket av raudleta verskinn, dekket av delfinskinn, forhengsteppet,

³⁵lovkista med stengene, soningsstaden,

³⁶bordet med alt som høyrde til, skodebrøda,

³⁷ljosestaken av reint gull med lamper som skulle setjast i rad, og alt som høyrde til, oljen til ljosestaken,

³⁸det gullkledde altaret, salvingsoljen, den velluktande røykjelsen, teppet til teltdøra,

³⁹bronsealtaret med bronsegitteret, stengene og alt som høyrde til, vaskekaret med fotstykke,

⁴⁰omhenga til føregarden med stolpar og fotstykke, teppet til føregardsporten, snorene, pluggane, alle reiskapane som skulle brukast til tenesta i heilagdomen, i møteteltet,

⁴¹embetsskrudet til tenesta i heilagdomen, dei heilage kleda åt Aron, presten, og kleda åt sønene hans til prestetenesta.

⁴²Som Herren hadde sagt Moses føre, heiltopp såleis gjorde israelittane alt arbeidet.

⁴³Og Moses såg på alt det som var gjort, og sjå, no var det fullført. Som Herren hadde sagt, så hadde dei gjort det. Og Moses velsigna dei.