Read nynorsk 1978 2. Mosebok 40 Bible Online

2. Mosebok 40 - nynorsk 1978 bible

2. Mosebok 40

¹Herren sa til Moses:

²Den fyrste dagen i den fyrste månaden skal du reisa den heilage bustaden, møteteltet.

³Der skal du setja lovkista og hengja forhenget framfor kista.

⁴Du skal setja inn bordet, og på det skal du leggja det som der skal vera. Og du skal bera inn ljosestaken og setja opp lampene på han.

⁵Det gullkledde røykjelsesaltaret skal du setja framfor lovkista og hengja opp teppet for døra til heilagdomen.

⁶Brennofferaltaret skal du setja framfor døra til den heilage bustaden, til møteteltet.

⁷Vaskekaret skal du setja mellom møteteltet og altaret og ha vatn i det.

⁸Så skal du setja opp føregarden rundt ikring og hengja opp teppet i føregardsporten.

⁹Sidan skal du ta salvingsoljen og salva heilagdomen og alt som er i han, og vigsla både teltet og alt som høyrer til der, så det vert heilagt.

¹⁰Du skal salva brennofferaltaret og alt som høyrer til, og vigsla altaret, så det vert høgheilagt.

¹¹Og du skal salva vaskekaret og fotstykket og vigsla det.

¹²Så skal du føra Aron og sønene hans bort til møteteltdøra og vaska dei med vatn.

¹³Og du skal kle Aron i den heilage kledebunaden, salva han og vigsla han, og så skal han vera prest for meg.

¹⁴Sønene hans skal du òg føra fram og kle i kjortlar.

¹⁵Du skal salva dei, liksom du salva far deira, og så skal dei vera prestar for meg. Denne salvinga skal gje dei retten til prestedømet, i ætt etter ætt, for alle tider.

¹⁶Moses gjorde så; han gjorde i alle måtar som Herren hadde sagt han føre.

¹⁷Den fyrste månaden i det andre året, den fyrste dagen i månaden, vart heilagdomen reist.

¹⁸Det var Moses som reiste heilagdomen. Han la ned fotstykka og reiste plankane, la inn tverrstengene og sette opp stolpane.

¹⁹Han breidde taket ut over teltheilagdomen, og ovanpå det la han dekket, så som Herren hadde sagt han føre.

²⁰Så tok Moses lova og la henne i paktkista, sette stengene i og sette soningsstaden oppå kista.

²¹Han sette lovkista inn i heilagdomen og hengde opp forhengsteppet framfor henne, så som Herren hadde sagt han føre.

²²Han sette bordet inn i møteteltet, ved nordveggen i heilagdomen, utanfor forhenget,

²³og la brøda i rad på det for Herrens åsyn, så som Herren hadde sagt han føre.

²⁴Midt for bordet sette han ljosestaken, ved sørveggen i heilagdomen,

²⁵og han sette opp lampene for Herrens åsyn, så som Herren hadde sagt han føre.

²⁶Det gullkledde altaret sette han òg i møteteltet, framfor forhenget,

²⁷og brende velluktande røykjelse på det, som Herren hadde sagt han føre.

²⁸Så hengde Moses opp teppet for døra til heilagdomen,

²⁹sette brennofferaltaret attmed døra til den heilage bustaden, til møteteltet, og ofra brennoffer og grødeoffer på det, som Herren hadde sagt han føre.

³⁰Vaskekaret sette han mellom møteteltet og altaret og hadde vatn i det til å vaska seg med.

³¹I det vaska Moses og Aron og sønene hans hender og føter.

³²Når dei skulle gå inn i møteteltet og stiga fram for altaret, vaska dei seg, som Herren hadde sagt Moses føre.

³³Så sette han opp føregarden kring heilagdomen og altaret og hengde opp teppet i føregardsporten. Såleis fullførte Moses verket.

³⁴Så sveipte skya seg om møteteltet, og Herrens herlegdom fylte heilagdomen. [51]

³⁵Moses kunne ikkje gå inn i møteteltet, fordi skya låg over teltet, og Herrens herlegdom fylte heilagdomen.

³⁶Kvar gong skya lyfte seg frå heilagdomen, tok israelittane ut. Såleis gjorde dei på heile ferda.

³⁷Men når skya ikkje lyfte seg, heldt dei seg i ro til ho lyfte seg att.

³⁸For Herrens sky låg over heilagdomen om dagen, og om natta lyste ho som eld for augo på alle israelittane, så lenge ferda varte.