Read nynorsk 1978 Job 10 Bible Online

Job 10 - nynorsk 1978 bible

Job 10

¹Eg er lei av livet, vil klaga mi naud. Eg er beisk i hug og vil tala ut.

²Eg seier til Gud: ¬Fordøm meg ikkje! Lat meg få vita ¬kvifor du klagar meg.

³Har du glede av å gjera urett, av å vraka det du sjølv ¬har skapt, og la ljoset skina over planane åt dei vonde?

⁴Har du då augo ¬som ein skapning, ser du så som menneske ser?

⁵Er dine dagar ¬som dagane åt mennesket og dine år som mannens år,

⁶sidan du leitar etter skuld ¬hjå meg og spør etter mine synder?

⁷Du veit at om eg er skuldlaus, kan ingen berga meg ¬or di hand.

⁸Det er du som har forma ¬og skapt meg, og så snur du om og tyner meg!

⁹Kom i hug ¬at du har laga meg av leire, og så lèt du meg verta ¬til jord att!

¹⁰Du lét meg renna ut som mjølk og sidan stivna liksom ost.

¹¹Du kledde meg ¬med kjøt og skinn og vov meg i hop ¬med bein og sener.

¹²Du gav meg liv ¬og var trufast mot meg, med omhug verna du mi ånd.

¹³Men dette gøymde du i hjarta, eg veit du hadde det i tankar:

¹⁴Du ville vakta på meg ¬når eg synda og ikkje frikjenna meg ¬for skuld.

¹⁵Ve meg om eg var skuldig! Og hadde eg rett, kunne eg ikkje lyfta hovudet. Eg var mett av skam og full av liding.

¹⁶Og lyfte eg likevel hovudet, ville du jaga meg som ei løve og atter fara underleg fram ¬mot meg.

¹⁷Du ville føra nye vitne mot meg, visa meg aukande uvilje og atter og atter ¬senda dine hærar mot meg.

¹⁸Kvifor lét du meg koma ut ¬or mors liv? Gjev eg hadde døytt ¬før nokon fekk sjå meg!

¹⁹Det hadde vore ¬som om eg aldri var til, frå mors liv ¬hadde dei ført meg til grava.

²⁰Kor få mine levedagar er! Gjev han ville la meg vera, så eg kunne få litt glede

²¹før eg går bort ¬til det kolmørke landet, som eg aldri kjem att ifrå: [12]

²²eit land så svart som natta, der mørker og ugreie rår, og ljoset er mørkt som natta.