Read nynorsk 1978 Job 38 Bible Online

Job 38 - nynorsk 1978 bible

Job 38

¹Då svara Herren Job or stormen:

²Kven er det som gjer ¬mi rådgjerd uklår med uvituge ord?

³Spenn beltet om livet ¬som ein mann! Så vil eg spørja deg, og du skal svara meg. [27]

⁴Kvar var du ¬då eg grunnla jorda? Sei fram, om du har skjøn!

⁵Kven har fastsett hennar mål ¬— det veit du vel? Kven spente mælesnor ut ¬over henne?

⁶Kvar vart hennar soklar ¬søkkte ned, og kven la hennar hjørnestein,

⁷medan alle morgonstjerner ¬jubla, og alle Guds søner ¬ropa av fryd? [28]

⁸Kven stengde for havet ¬med portar, då det braut skummande fram ¬frå djupet,

⁹den gong eg kledde det ¬med skyer og sveipte det i mørke skodda,

¹⁰den gong eg sette grense for det og stengde med bom og dører?

¹¹Hit kjem du, sa eg, ikkje lenger, her skal dei stogga, ¬dine byrge bylgjer.

¹²Har du nokon gong ¬kalla morgonen fram og synt morgonroden hans stad,

¹³så han tek tak i endane av jorda og rister dei gudlause av?

¹⁴Då tek ho form ¬som leira under seglet, og alt syner seg ¬som i nytt skrud.

¹⁵Dei vonde misser ¬det ljoset dei hadde, og armen dei lyfte, vert knust.

¹⁶Har du nått fram ¬til havsens kjelder og ferdast på botnen ¬av det store djup?

¹⁷Har dødens portar ¬vist seg for deg, har du sett dørene ¬til den kolmørke staden? [29]

¹⁸Har du skoda ut ¬over viddene på jorda? Sei frå om du kjenner alt dette.

¹⁹Kvar går vegen ¬til bustaden åt ljoset, og kvar held mørkret til?

²⁰Så ta dei med til deira heimstad, du kjenner stigane til deira hus.

²¹Du veit det ¬om du har levt så lenge at du var til då dei vart skapte.

²²Har du vore ¬der snøen kjem ifrå, har du sett staden ¬der haglet ligg?

²³Eg har spart dei til trengselstida, til det kjem ein dag ¬med kamp og krig.

²⁴Korleis kjem ein dit ¬der ljoset deler seg, og der austavinden ¬breier seg over jorda?

²⁵Kven laga renner ¬for det fløymande vatnet, og kven brøytte veg ¬for tore og lyn,

²⁶så det regnde ¬over folketomt land, over øydemark der ingen bur,

²⁷så det aude landet ¬fekk rikeleg med vatn, og graset grodde or grunnen?

²⁸Har regnet ein far? Og kven har avla doggdropane?

²⁹Kva morsliv kjem vel isen frå, kven har født rimet ¬som fell frå himmelen,

³⁰når vatnet frys og vert som stein og flata ¬på havdjupet ligg under is?

³¹Kan du knyta Sjustjerne-bandet eller løysa Orions lekkjer?

³²Kan du få kveldsstjerna fram ¬i rette tid, eller leia Løva og hennar ungar? [30]

³³Kjenner du lovene ¬som rår på stjernehimmelen? Fastset du hans velde ¬over jorda?

³⁴Kan du lyfta di røyst til skyene, så vatnet fløymer ned over deg?

³⁵Kan du senda ut lyn, ¬så dei fer av stad og seier til deg: «Her er vi»?

³⁶Kven har gjeve ibisen visdom, kven har late hanen få vit? [31]

³⁷Kven er så klok ¬at han kan telja skyer, og kven tømer vatn ¬or himmel-kara,

³⁸når jorda hardnar og fastnar, og molda klumpar seg saman?