Read nynorsk 1978 Job 42 Bible Online

Job 42 - nynorsk 1978 bible

Job 42

¹Då tok Job til ords og svara Herren:

²Eg veit at allting maktast du; ingen ting er umogeleg for deg av det du har sett deg føre.

³Kven er det som gjer ¬di rådgjerd uklår med uvituge ord? Eg har tala om ting ¬eg ikkje skjønar, om det som er så underfullt at eg ikkje forstår det.

⁴Men høyr på meg, så vil eg tala. Eg vil spørja deg, og du skal svara meg.

⁵Før hadde eg berre høyrt ¬om deg, men no har eg sett deg ¬med eigne augo.

⁶Difor tek eg att kvart ordet og syner min anger ¬i støv og oske.

⁷Då Herren hadde tala dette til Job, sa han til Elifas frå Teman: «Eg er brennande harm på deg og dei to venene dine; for de har ikkje tala rett om meg, så som Job, tenaren min.

⁸Ta no sju oksar og sju verar og gå til Job, tenaren min, og ber dei fram som brennoffer for dykk! Så skal Job, tenaren min, be for dykk; og eg vil høyra bøna hans og spara dykk for den ulukka de hadde fortent, fordi de ikkje tala rett om meg, så som Job, tenaren min.»

⁹Elifas frå Teman, Bildad frå Sjuah og Sofar frå Na’ama gjekk då av stad og gjorde som Herren hadde sagt, og Herren høyrde bøna åt Job.

¹⁰Då Job hadde bede for venene sine, vende Herren lagnaden hans. Han lét Job få dobbelt så mykje som han før hadde hatt.

¹¹Og alle brørne hans kom til han, og like eins systrene og kjenningane hans. Dei sat til bords med han i huset hans, viste han medkjensle og trøysta han etter at Herren hadde sendt så mykje vondt over han. Kvar av dei gav han eit pengestykke og ein gullring.

¹²Sidan velsigna Herren Job endå meir enn før. Han fekk fjorten tusen sauer, seks tusen kamelar, tusen par oksar og tusen eselhopper.

¹³Og han fekk sju søner og tre døtrer.

¹⁴Den eine dottera kalla han Jemima, den andre Kesia og den tredje Keren-Happuk. [33] [34] [35]

¹⁵I heile landet fanst det ikkje så fagre kvinner som døtrene til Job. Faren lét dei arva til liks med brørne.

¹⁶Sidan levde Job i 140 år. Han fekk sjå born og barneborn i fire ættleder.

¹⁷Så døydde Job, gamal og mett av dagar.