Read nynorsk 1978 Salmane 55 Bible Online

Salmane 55 - nynorsk 1978 bible

Salmane 55

¹Til korleiaren. Med strengespel. Ein læresalme av David.

²Høyr mi bøn, Gud, løyn deg ikkje ¬når eg tryglar og bed.

³Akta på meg og gjev meg svar! Eg får ikkje ro for mi sut. Eg er heilt ifrå meg

⁴når fienden ropar, og dei gudlause ¬trykkjer meg ned. For dei velter vondskap ¬over meg, rasande går dei laus på meg.

⁵Mitt hjarta skjelv i barmen, dødsangst kjem over meg.

⁶Otte og age fyller meg, og heile kroppen skjelv.

⁷Eg tenkte: ¬Hadde eg venger som dua, då flaug eg bort ¬og fann meg ein bustad.

⁸Langt av garde ville eg røma og halda til i øydemarka. Sela

⁹Eg ville skunda meg i livd for storm og rykande uver.

¹⁰Skap redsle og rådløyse, Herre, og kløyv deira tunger! For eg ser berre vald ¬og strid i byen.

¹¹Dag og natt går dei ikring han oppå murane. Vondskap og urett rår i byen,

¹²han er full av rotenskap. Frå torget der ¬vik ikkje vald og svik.

¹³Det er ikkje ein fiende ¬som spottar meg — det kunne eg nok tola, ingen uven ¬som audmykjer meg — då ville eg gøyma meg ¬for han.

¹⁴Nei, det er du, min likemann, min gode ven og kjenning,

¹⁵— vi som hadde det godt i lag og gjekk i festtog til Guds hus.

¹⁶Lat døden koma over dei, lat dei levande fara ¬til dødsriket! For vondskap har dei ¬i heim og hug.

¹⁷Men eg vil ropa til Gud, og Herren skal frelsa meg.

¹⁸Både kveld og morgon ¬og midt på dagen må eg klaga og sukka. Han vil høyra når eg ropar,

¹⁹fria meg frå striden ¬og gje meg fred, endå mange går imot meg.

²⁰Gud skal høyra meg ¬og audmykja dei, han som frå eldgamal tid ¬sit på trona. Sela For dei snur ikkje om og har ikkje age for Gud.

²¹Fienden legg hand ¬på sine vener, skamlaust bryt han si pakt.

²²Hans tale er sleipare enn smør, men i hjarta ¬tenkjer han på strid. Hans ord er mildare enn olje, likevel er dei ¬som dregne sverd.

²³Kast di bør på Herren, han vil syta for deg! Aldri i æve skal han la den rettferdige rikkast.

²⁴Men du, Gud, støyt drapsmenn og svikarar ned i den djupe grav, så dei berre får helvta ¬av sine dagar. Men eg set mi lit til deg.