Read nynorsk 1978 Høgsongen 6 Bible Online

Høgsongen 6 - nynorsk 1978 bible

Høgsongen 6

¹«Kvar er din ven faren, du fagraste av kvinner? Sei, kvar har din ven ¬teke vegen, så vi kan vera med deg ¬og leita.»

²«Min ven gjekk ned ¬i hagen sin, til dei angande blomesenger. Han ville gjæta i hagane og sanka liljer der.

³Min ven er min, og eg er hans, han som gjæter mellom liljer.»

⁴Du er fager som Tirsa, ¬min hugnad, yndefull som Jerusalem, ageleg som ein hær ¬under merke. [11]

⁵Vend augo dine frå meg, dei villar meg. Ditt hår er som ein geiteflokk, dansande nedetter ¬Gileads fjell.

⁶Dine tenner er som sauer, nett komne or laug. Tvillingar har dei alle, og ingen av dei ¬har mist sine lam.

⁷Som ei skive av eit granateple er di panne attom sløret.

⁸Seksti dronningar er der, åtti fylgjekoner og terner utan tal.

⁹Men berre ei er mi due, mi lytelause, reine, einaste barnet til mor si, gullabarnet åt ho ¬som fødde henne. Møyar ser henne ¬og prisar henne sæl; dronningar og fylgjekoner ¬hyller henne.

¹⁰«Kven er ho ¬som strålar lik ¬morgonroden, fager som fullmånen, ¬skir som sola og ageleg ¬som ein hær under merke?»

¹¹Eg gjekk ned i natahagen, ville sjå kor det grønkast ¬i dalen, om vintreet hadde sett ¬nye skot, om granataplane blømde.

¹²Men før eg vardest, fylgde eg mine hugskot og steig opp ¬i min gjæve frendes vogn.

¹³«Snu deg, snu deg, ¬du Sjulam-jente! Snu deg, snu deg, ¬så vi får sjå deg!» «Kvifor vil de sjå ¬på Sjulam-jenta når ho rekkjedansen trør?» [12]