Read nynorsk 1978 Jesaja 28 Bible Online

Jesaja 28 - nynorsk 1978 bible

Jesaja 28

¹Ve den stolte kransen åt Efraims drukne menn! Ve dei visnande blomane, Efraims herlege prydnad, på høgda ¬over den grøderike dalen, der dei ligg drukne av vin. [88] [89]

²Sjå, Herren sender ¬ei mektig kjempe. Som ein hagl-eling, ¬ein øydande storm, som ei kraftig regnskur ¬med flaumar av vatn slår han dei til jorda med makt. [90]

³Under fot skal han trakkast, den stolte kransen åt Efraims drukne menn.

⁴Med dei visnande blomane, Efraims herlege prydnad, på høgda ¬over den grøderike dalen, skal det gå ¬som med ein sommarfiken som er mogen før hausten: Når nokon ser han, ¬sluker dei han så snart dei får han i handa.

⁵Den dagen skal Herren, ¬Allhærs Gud, verta ein fager krans ¬og ei strålande krone for leivningen av folket sitt.

⁶Han skal gje den ¬som sit på domarsetet, evne til å døma rett, og styrkja dei som driv fienden attende frå porten.

⁷Men det er andre òg ¬som sjanglar, som ragar av vin ¬og sterk drikk: Prestar og profetar er drukne, heilt fortumla av vin. Dei ragar ¬av den sterke drikken, dei sjanglar når dei har syner, og er ustøe når dei dømer.

⁸Ja, alle bord er fulle av spy, ikkje ein flekk er rein.

⁹«Kven vil profeten ¬gje kunnskap? Kven vil han få ¬til å skjøna sin bodskap? Born som nett er avvande, som nyss er tekne frå brystet?

¹⁰Bod på bod, krav på krav, litt her og litt der!» [91]

¹¹Ja, gjennom folk ¬med stammande lipper og med framandt tungemål skal han tala til dette folket, [92]

¹²han som sa til dei: «Her er staden der dei kan slå seg ned. Lat den trøytte få ro, her kan han kvila.» Men dei ville ikkje høyra.

¹³Så skal då Herrens ord for dei verta «bod på bod, krav på krav, litt her og litt der!» Når dei går, skal dei snåva, detta bakover og skamslå seg, gå i snara og verta fanga.

¹⁴Så høyr då Herrens ord, ¬de spottarar som rår over folket i Jerusalem!

¹⁵De seier: «Vi har gjort ei pakt ¬med døden, ein avtale med dødsriket. Når flaumen kjem veltande, skal han ikkje nå oss. For vi har gjort lygn til livd og løynt oss bak svik.» [93] [94]

¹⁶Difor, så seier Herren vår Gud: Sjå, eg legg ein grunnstein ¬på Sion, ein velprøvd stein, ein dyrverdig, ¬grunnfast hjørnestein. Den som trur, tek det med ro.

¹⁷Eg vil gjera rett til mælesnor, rettferd til loddsnor. Hagl skal sopa bort lygnlivda, vatn skal skylja vekk ¬deira gøymsle.

¹⁸Den pakt de har med døden, skal setjast ut av kraft, avtalen med dødsriket skal ikkje stå ved lag. Når flaumen kjem veltande, skal han slå dykk ned.

¹⁹Så tidt han kjem farande, skal han riva dykk med seg. For morgon etter morgon ¬skal han koma, ja, både dag og natt. De skal skjelva av redsle når de skjønar bodskapen.

²⁰For senga er for kort til å strekkja seg i og teppet for lite til å sveipa seg i.

²¹Ja, Herren skal reisa seg som på Perasim-fjellet og harmast som ¬i Gibeon-dalen. Han skal gjera si gjerning, ei underleg gjerning. Han skal gjera sitt verk, eit sjeldsynt verk.

²²Hald no opp ¬med den frekke spott, så lekkjene dykkar ¬ikkje skal strammast! For frå Herren, Allhærs Gud, ¬har eg høyrt at øyding er fastsett ¬for heile landet.

²³Vend øyra til og høyr mi røyst, lyd etter og høyr kva eg seier!

²⁴Når bonden pløyer og skal så, held han då støtt på med å pløya og snu ¬og horva si jord?

²⁵Nei, når han har jamna åkeren, spreier han dill ¬og strøyer ut karve, sår kveite, durra, bygg ¬og hirse, og spelt langsmed åkerreina. [95]

²⁶Hans Gud har synt han ¬den rette måten og lært han ¬korleis det skal gjerast.

²⁷Ingen treskjer dill med slede eller rullar vognhjul over ¬karve. Nei, dill vert banka ut med ¬stav og karve med ein kjepp.

²⁸Vert vel brødkornet knust? Nei, ein treskjer det ¬ikkje for lenge. Ein køyrer hestar ¬og vogner over, men lèt ikkje hjula ¬knusa kornet.

²⁹Dette òg kjem frå Herren, ¬Allhærs Gud. Underfulle er hans råd, stor er hans visdom.