Read nynorsk 1978 3. Mosebok 1 Bible Online

3. Mosebok 1 - nynorsk 1978 bible

3. Mosebok 1

¹Herren ropa på Moses og tala til han frå møteteltet:

²Tal til israelittane og sei til dei: Når nokon av dykk vil bera fram for Herren eit offer av buskapen, kan de ta offeret anten av storfeet eller av småfeet.

³Er det eit brennoffer av storfeet han vil gje, skal det vera ein okse som er utan lyte. Han skal leia dyret fram til møteteltdøra, så Herren kan ha hugnad i han.

⁴Og han skal leggja handa på hovudet åt offerdyret. Då skal offeret tekkjast Herren og vera til soning for han.

⁵Så skal han slakta oksen for Herrens åsyn, og Arons-sønene, prestane, skal bera fram blodet og skvetta det rundt ikring på altaret som står framfor møteteltdøra.

⁶Sidan skal han flå offerdyret og lema det sund,

⁷og Arons-sønene, prestane, skal kveikja opp eld på altaret og leggja veden til rettes på elden.

⁸Dei skal leggja kjøtet og hovudet og feittet oppå veden som er lagd på altarelden.

⁹Innvolen og føtene skal vaskast i vatn, og så skal presten brenna alt saman på altaret. Det er eit brennoffer, eit eldoffer til godange for Herren.

¹⁰Tek han offeret av småfeet, av sauene eller geitene, skal det vera ein lytelaus ver eller bukk.

¹¹Den skal han slakta på nordsida av altaret, for Herrens åsyn, og Arons-sønene, prestane, skal skvetta blodet rundt ikring på altaret.

¹²Så skal han dela offerdyret opp i stykke, og presten skal ta stykka saman med hovudet og feittet og leggja dei til rettes oppå veden som er lagd på altarelden.

¹³Innvolen og føtene skal vaskast i vatn, og så skal presten bera fram alt saman og brenna det på altaret. Det er eit brennoffer, eit eldoffer til godange for Herren.

¹⁴Er det ein fugl han vil ta til brennoffer åt Herren, skal det vera ei turteldue eller ein dueunge.

¹⁵Presten skal bera fuglen fram til altaret, vri hovudet av han og brenna det på altaret. Blodet skal pressast ut mot altarveggen.

¹⁶Han skal ta ut kråsen med det som er i den, og kasta det på austsida av altaret, der den feite offeroska ligg.

¹⁷Så skal presten slita laus vengene, men ikkje riva dei av, og brenna fuglen på altaret, på veden som er lagd på elden. Det er eit brennoffer, eit eldoffer til godange for Herren.