Read nynorsk 1978 3. Mosebok 12 Bible Online

3. Mosebok 12 - nynorsk 1978 bible

3. Mosebok 12

¹Herren tala til Moses og sa:

²Sei til israelittane: Når ei kvinne skal ha barn og får ein son, er ho urein i sju dagar. Ho er urein like lenge som når ho har månadstida si.

³Den åttande dagen skal førehuda åt guten skjerast av.

⁴Sidan skal ho halda seg heime i trettitre dagar, medan blodet går og ho vert reinsa. Ho må ikkje røra noko heilagt og ikkje koma til heilagdomen før reinsingsdagane hennar er ute.

⁵Får ho ei jente, er ho urein i to veker, som når ho har månadstida si. Sidan skal ho halda seg heime i sekstiseks dagar, medan blodet går og ho vert reinsa.

⁶Når reinsingsdagane er ute, skal ho, anten ho har fått son eller dotter, koma med eit årsgamalt lam til brennoffer og ein dueunge eller ei turteldue til syndoffer. Ho skal bera det fram til møteteltdøra og gje det til presten.

⁷Han skal ofra det for Herrens åsyn og gjera soning for henne. Då vert ho rein etter blødinga. Dette er lova for kvinner som får barn, anten det er gut eller jente.

⁸Men har ho ikkje råd til å ofra ein sau, skal ho ta to turtelduer eller to dueungar, den eine til brennoffer og den andre til syndoffer, og presten skal gjera soning for henne. Då vert ho rein.