Read nynorsk 1978 3. Mosebok 18 Bible Online

3. Mosebok 18 - nynorsk 1978 bible

3. Mosebok 18

¹Herren tala til Moses og sa:

²Sei til israelittane: Eg er Herren dykkar Gud.

³De skal ikkje fara åt som folket i Egypt, der de har butt, eller som dei gjer i Kanaan, det landet eg fører dykk til. De skal ikkje fylgja skikkane deira.

⁴Mine lover skal de halda, og mine føresegner skal de akta på, så de fylgjer dei. Eg er Herren dykkar Gud.

⁵De skal halda føresegnene og lovene mine. Det mennesket som rettar seg etter dei, skal leva ved dei. Eg er Herren.

⁶Ingen av dykk må røra ei nærskyld kvinne og liggja med henne. Eg er Herren.

⁷Du skal ikkje liggja med mor di og såleis vanæra far din. Ho er mor di; du skal ikkje liggja med henne.

⁸Du skal ikkje liggja med stykmor di; ho høyrer far din til.

⁹Du skal ikkje liggja med syster di, som har same far eller same mor som du. Anten ho er fødd heime eller ute, skal du ikkje liggja med henne.

¹⁰Du skal ikkje liggja med sonedotter eller dotterdotter di; for såleis fører du skam over deg sjølv.

¹¹Du skal ikkje liggja med dotter til stykmor di som er dotter til far din òg; ho er syster di.

¹²Du skal ikkje liggja med syster til far din; ho er i nær slekt med far din.

¹³Du skal ikkje liggja med syster til mor di; ho står mor di for nær.

¹⁴Du skal ikkje liggja med kona til farbror din; henne må du ikkje koma for nær. Ho er tanta di.

¹⁵Du skal ikkje liggja med verdotter di. Ho er kona til son din; du skal ikkje liggja med henne.

¹⁶Du skal ikkje liggja med kona til bror din; ho høyrer bror din til.

¹⁷Du skal ikkje liggja med ei kvinne og dotter hennar. Heller ikkje skal du ta sonedotter eller dotterdotter hennar og liggja med dei; dei er i nær slekt med henne. Det er skamlaus ferd.

¹⁸Du skal ikkje gifta deg med syster til kona di og liggja med henne medan kona di lever; for då skaper du strid mellom dei.

¹⁹Du skal ikkje gå til ei kvinne og liggja med henne når ho har månadstida si og er urein.

²⁰Du skal ikkje liggja med kona til ein landsmann og såleis gjera deg urein.

²¹Du skal ikkje gje nokon av borna dine til Molok; du skal ikkje vanhelga namnet åt din Gud. Eg er Herren.

²²Du skal ikkje liggja med ein mann som ein ligg med ei kvinne. Det er ein styggedom.

²³Du skal aldri ha omgang med dyr; for då vert du urein. Heller ikkje skal ei kvinne by seg fram til eit dyr og para seg med det. Det er stygg åtferd.

²⁴Gjer dykk ikkje ureine med noko slikt! For med alt dette har dei gjort seg ureine, dei folkeslaga som eg vil driva ut for dykk.

²⁵Landet har vorte ureint, og eg vil straffa det for synda, så det spyr ut dei som bur der.

²⁶Men de, anten de er fødde i landet eller er innflyttarar der, skal halda føresegnene og lovene mine og ikkje gjera noka av desse avskyelege gjerningane —

²⁷for alle desse stygge gjerningane gjorde dei som budde i landet før dykk, og landet vart ureint.

²⁸Elles kjem landet til å spy dykk ut, fordi de gjer det ureint, liksom det har spytt ut det folket som var der før dykk.

²⁹For alle som gjer slike stygge gjerningar, alle som finn på slikt, skal rydjast ut or folket sitt.

³⁰Så hald dykk då etter det som eg har fastsett, og fylg ikkje nokon av dei skamlause skikkane som dei har fylgt før dykk! Gjer dykk ikkje ureine med dei! Eg er Herren dykkar Gud.