Read nynorsk 1978 3. Mosebok 23 Bible Online

3. Mosebok 23 - nynorsk 1978 bible

3. Mosebok 23

¹Herren tala til Moses og sa:

²Sei til israelittane: Dette er Herrens høgtider, mine fastsette tider, då de skal lysa ut heilage samlingar.

³Seks dagar skal de arbeida, men den sjuande dagen skal vera full kviledag med heilag samling. Då må de ikkje gjera noko arbeid. Det skal vera sabbat for Herren alle stader der de bur.

⁴Dette er Herrens høgtider, dei heilage samlingane som de til fastsette tider skal ropa ut.

⁵Den fjortande dagen i den fyrste månaden, straks etter soleglad, er det påske for Herren.

⁶Og den femtande dagen i same månaden er det usyrdebrødshelg for Herren. I sju dagar skal de eta usyrt brød.

⁷Den fyrste dagen skal de halda ei heilag samling. Då må de ikkje gjera noko arbeid.

⁸Alle sju dagane skal de bera fram eldoffer for Herren. Den sjuande dagen skal de òg halda ei heilag samling. Då må de ikkje gjera noko arbeid.

⁹Herren tala til Moses og sa:

¹⁰Sei til israelittane: Når de kjem inn i det landet eg vil gje dykk, og skjer kornet der, då skal de gå til presten med det fyrste kornbandet de har skore.

¹¹Han skal svinga det for Herrens åsyn, så Herren kan ha hugnad i dykk. Dagen etter sabbaten skal presten svinga kornbandet.

¹²Same dagen som de svingar kornbandet, skal de bera fram eit årsgamalt, lytelaust lam som brennoffer til Herren

¹³og grødeofferet som høyrer til. Det skal vera to tiandedels efa kveitemjøl med olje i; då er det eit eldoffer til godange for Herren. Til det kjem drikkofferet, ein fjerdedels hin vin.

¹⁴De skal ikkje eta brød og ikkje steikt eller friskt korn før den dagen de ber fram gåva åt dykkar Gud. Det skal vera ei evig lov for dykk og etterkomarane dykkar, kvar de så bur.

¹⁵Frå dagen etter sabbaten, frå den dagen de kjem med kornbandet som skal svingast, skal de telja sju fulle veker.

¹⁶Femti dagar skal de telja, til dagen etter den sjuande sabbaten. Då skal de bera fram for Herren ei offergåve av den nye grøda.

¹⁷De skal ta med heimanfrå to brød som skal svingast. Dei skal lagast av to tiandedels efa kveitemjøl og bakast med surdeig. Det er fyrstegrøda, som høyrer Herren til.

¹⁸Attåt brødet skal de bera fram sju årsgamle, lytelause lam, ein ung okse og to verar — dei skal vera brennoffer for Herren — og grødeofferet og drikkoffera som høyrer til. Det er eit eldoffer til godange for Herren.

¹⁹Så skal de ofra ein bukk som syndoffer og to årsgamle verlam som måltidsoffer.

²⁰Presten skal svinga dei for Herrens åsyn saman med brøda av fyrstegrøda og to lam. Dei skal vera vigde til Herren og høyra presten til.

²¹Same dagen skal de ropa ut ei heilag samling. Då må de ikkje gjera noko arbeid. Dette skal vera ei evig lov for dykk og etterkomarane dykkar, kvar de så bur.

²²Når de haustar inn grøda i landet, skal du ikkje skjera kornet heilt ut til åkerkanten, og dei aksa som ligg att etter skurden, skal du ikkje plukka opp. Du skal la dei liggja til dei fattige og innflyttarane. Eg er Herren dykkar Gud.

²³Herren tala til Moses og sa:

²⁴Sei til israelittane: Den fyrste dagen i den sjuande månaden skal de halda kviledag. Då skal de blåsa i horn og minna om den heilage samlinga.

²⁵Den dagen må de ikkje gjera noko arbeid, og de skal bera fram eldoffer for Herren.

²⁶Herren tala til Moses og sa:

²⁷Den tiande dagen i same månaden skal vera soningsdag. Då skal de halda ei heilag samling, fasta og bera fram eldoffer for Herren.

²⁸Den dagen må de ikkje gjera noko arbeid, for det er soningsdag. Då skal det gjerast soning for dykk framfor Herren dykkar Guds åsyn.

²⁹Alle som ikkje fastar den dagen, skal rydjast ut or folket sitt.

³⁰Og kvar den som gjer noko arbeid den dagen, vil eg tyna midt imellom folket hans.

³¹De skal ikkje gjera noko arbeid. Det skal vera ei evig lov for dykk og etterkomarane dykkar, kvar de så bur.

³²De skal ha full kviledag, og de skal fasta. Frå niande dags kvelden i den månaden til kvelden etter skal de halda sabbatskvild.

³³Herren tala til Moses og sa:

³⁴Sei til israelittane: Frå den femtande dagen i den sjuande månaden skal de halda lauvhyttehelg for Herren i sju dagar.

³⁵Den fyrste dagen skal det vera ei heilag samling. Då må de ikkje gjera noko arbeid.

³⁶Sju dagar skal de bera fram eldoffer for Herren. Den åttande dagen skal de halda ei heilag samling og bera fram eldoffer for Herren. Då er det høgtidssamling, og de må ikkje gjera noko arbeid. [10]

³⁷Dette er Herrens høgtider, då de skal ropa ut heilage samlingar og bera fram eldoffer for Herren, brennoffer og grødeoffer, slaktoffer og drikkoffer, kvar dag det som høyrer den dagen til.

³⁸Til dette kjem Herrens sabbatar og dei gåvene, lovnadsoffera og friviljuge offera som de gjev Herren.

³⁹Frå den femtande dagen i den sjuande månaden, når de samlar inn grøda i landet, skal de halda Herrens helg i sju dagar. Den fyrste dagen skal vera kviledag, og den åttande dagen skal vera kviledag.

⁴⁰Den fyrste dagen skal de ta frukter av edle tre, palmeblad, greiner av lauvtre og poplar som veks attmed bekkene, og gleda dykk i sju dagar framfor Herren dykkar Guds åsyn.

⁴¹Såleis skal de kvart år halda høgtid for Herren i sju dagar. Det skal vera ei evig lov for dykk og etterkomarane dykkar. I den sjuande månaden skal de halda denne høgtida.

⁴²Då skal de bu i lauvhytter i sju dagar. Alle som er fødde og fostra i Israel, skal bu i lauvhytter,

⁴³så etterkomarane dykkar skal vita at eg lét israelittane bu i hytter då eg førte dei ut or Egypt. Eg er Herren dykkar Gud.

⁴⁴Moses kunngjorde Herrens høgtider for israelittane.