Read nynorsk 1978 3. Mosebok 3 Bible Online

3. Mosebok 3 - nynorsk 1978 bible

3. Mosebok 3

¹Vil nokon bera fram eit måltidsoffer, og han tek det av storfeet, skal det vera eit lytelaust dyr han leier fram for Herrens åsyn, anten okse eller ku.

²Han skal leggja handa på hovudet åt offerdyret og slakta det innmed møteteltdøra, og Arons-sønene, prestane, skal skvetta blodet rundt ikring på altaret.

³Av måltidsofferet skal han bera fram eit eldoffer for Herren. Det skal vera netja og alt feittet som er på innvolen,

⁴begge nyrene med talga som er på dei innmed hoftemusklane, og leverlappen, som han skal ta ut saman med nyrene.

⁵Arons-sønene skal brenna det på altaret saman med brennofferet som ligg på veden dei har lagt på elden. Dette er eit eldoffer til godange for Herren.

⁶Men vil han bera fram for Herren eit måltidsoffer av småfeet, skal det vera eit lytelaust dyr han leier fram, anten hann eller ho.

⁷Vil han ofra ein sau, skal han leia han fram for Herrens åsyn,

⁸leggja handa på hovudet åt offerdyret og slakta det framfor møteteltet, og Arons-sønene skal skvetta blodet rundt ikring på altaret.

⁹Av måltidsofferet skal han bera fram eit eldoffer for Herren. Det skal vera feittet på dyret: heile feitthalen, som han skal skjera tett innmed ryggbeinet, netja og alt feittet som er på innvolen,

¹⁰begge nyrene med talga som er på dei innmed hoftemusklane, og leverlappen, som han skal ta ut saman med nyrene.

¹¹Presten skal brenna det på altaret. Det er eldoffermat for Herren.

¹²Er det ei geit han vil ofra, skal han leia henne fram for Herrens åsyn,

¹³leggja handa på hovudet hennar og slakta henne framfor møteteltet, og Arons-sønene skal skvetta blodet rundt ikring på altaret.

¹⁴Av offeret skal han bera fram eit eldoffer for Herren. Det skal vera netja og alt feittet som er på innvolen,

¹⁵begge nyrene med talga som er på dei innmed hoftemusklane, og leverlappen, som han skal ta ut saman med nyrene.

¹⁶Presten skal brenna det på altaret. Det er eldoffermat til godange for Herren. Alt feitt høyrer Herren til.

¹⁷Dette skal vera ei evig lov for dykk og etterkomarane dykkar kvar de så bur. Feitt og blod må de aldri eta.