Read nynorsk 1978 3. Mosebok 4 Bible Online

3. Mosebok 4 - nynorsk 1978 bible

3. Mosebok 4

¹Herren tala til Moses og sa:

²Sei til israelittane: Når nokon syndar av vanvare mot eit av Herrens bod og gjer noko han ikkje har lov til, gjeld desse føresegnene:

³Er det den salva presten som syndar og fører skuld over folket, skal han ofra ein ung, lytelaus okse som syndoffer til Herren for den synda han har gjort.

⁴Han skal leia oksen fram for Herrens åsyn, til møteteltdøra, leggja handa på hovudet åt oksen og slakta han for Herrens åsyn.

⁵Presten som er salva, skal ta noko av okseblodet og bera det inn i møteteltet.

⁶Han skal duppa fingeren i blodet og skvetta litt av det sju gonger for Herrens åsyn, framfor forhenget i heilagdomen.

⁷Noko av blodet skal han stryka på horna på altaret med den velluktande røykjelsen, det som står for Herrens åsyn i møteteltet. Det som er att av okseblodet, skal han hella ut nedmed foten på brennofferaltaret, som står framfor møteteltdøra.

⁸Alt feittet skal han ta ut or syndofferoksen, både netja og alt feittet som er på innvolen,

⁹begge nyrene med talga som er på dei innmed hoftemusklane, og leverlappen, som han skal skjera ut saman med nyrene.

¹⁰Alt dette skal presten ta ut, like eins som på oksen til måltidsofferet, og så skal han brenna det på brennofferaltaret.

¹¹Men skinnet av oksen og alt kjøtet, med hovud og føter, innvol og mageinnhald,

¹²heile oksen, skal han føra ut or leiren til ein rein stad, der dei tømer den feite offeroska, og brenna han opp med ved. På den staden der dei tømer offeroska, skal han brennast.

¹³Har heile Israels-lyden synda av vanvare, har heile folket utan å vita om det gjort noko som ikkje er tillate etter eit av Herrens bod, og ført skuld over seg,

¹⁴skal folket ofra ein ung okse til syndoffer når synda vert kjend. Dei skal leia han fram til møteteltet,

¹⁵dei eldste av lyden skal leggja hendene på hovudet åt oksen for Herrens åsyn, og så skal oksen slaktast der.

¹⁶Presten som er salva, skal bera noko av okseblodet inn i møteteltet.

¹⁷Han skal duppa fingeren i blodet og skvetta det sju gonger for Herrens åsyn, framfor forhenget.

¹⁸Noko av blodet skal han stryka på horna på det altaret som står for Herrens åsyn i møteteltet. Det som er att av blodet, skal han hella ut nedmed foten på brennofferaltaret, som står framfor møteteltdøra.

¹⁹Alt feittet skal han ta ut or oksen og brenna det på altaret.

²⁰Som han gjorde med den fyrste syndofferoksen, så skal han gjera med denne òg. Såleis skal presten gjera soning for dei, så dei får tilgjeving.

²¹Han skal føra oksen ut or leiren og brenna han, liksom han brende den fyrste oksen. Dette er syndofferet for Israels-lyden.

²²Når ein hovding av vanvare syndar mot eit av boda åt Herren sin Gud, og gjer noko som han ikkje har lov til, og fører skuld over seg,

²³då skal han bera fram eit offer når han skjønar at han har synda. Det skal vera ein bukk som er utan lyte.

²⁴Han skal leggja handa på hovudet åt bukken og slakta han på same staden som dei slaktar brennofferdyret, for Herrens åsyn. Dette er eit syndoffer.

²⁵Presten skal ta noko av syndofferblodet på fingeren og stryka det på horna på brennofferaltaret. Det som er att av blodet, skal han hella ut nedmed foten på brennofferaltaret.

²⁶Alt feittet skal han brenna på altaret, liksom han gjorde med feittet av måltidsofferet. Såleis skal presten gjera soning for han og for synda hans, så han får tilgjeving.

²⁷Er det ein mann av folket som av vanvare syndar mot eit av Herrens bod og gjer noko som han ikkje har lov til, og fører skuld over seg,

²⁸skal han bera fram eit offer for synda når han skjønar at han har synda. Det skal vera ei geit som er utan lyte.

²⁹Han skal leggja handa på hovudet åt syndofferdyret og slakta det på same staden som dei slaktar brennofferdyret.

³⁰Presten skal ta noko av blodet på fingeren og stryka det på horna på brennofferaltaret. Det som er att av blodet, skal han hella ut nedmed altarfoten.

³¹Alt feittet skal han ta ut, liksom dei tek feittet ut or måltidsofferet. Presten skal brenna det på altaret til godange for Herren. Såleis skal presten gjera soning for han, så han får tilgjeving.

³²Tek han ein sau til syndoffer, skal han koma med eit lytelaust hodyr.

³³Han skal leggja handa på hovudet åt dyret og slakta det til eit syndoffer på same staden som dei slaktar brennofferdyret.

³⁴Presten skal ta noko av syndofferblodet på fingeren og stryka det på horna på brennofferaltaret. Det som er att av blodet, skal han hella ut nedmed altarfoten.

³⁵Alt feittet skal han ta ut, liksom dei tek feittet ut or ein sau dei ofrar som måltidsoffer. Presten skal brenna det på altaret saman med eldofferet til Herren. Såleis skal presten gjera soning for han og for den synda han har gjort, så han får tilgjeving.