Read nynorsk 1978 3. Mosebok 6 Bible Online

3. Mosebok 6 - nynorsk 1978 bible

3. Mosebok 6

¹Herren tala til Moses og sa:

²Sei til Aron og sønene hans: Dette er lova om brennofferet: Brennofferet skal liggja på eldstaden på altaret heile natta, til morgons, og altarelden skal brenna.

³Presten skal kle seg i linkjortelen sin og bera ei bukse av lin nærast kroppen. Han skal ta bort oska etter brennofferet som elden har tært opp på altaret, og leggja henne attmed altaret.

⁴Så skal han ta av seg kledebunaden sin, ha på seg andre klede og bera oska ut or leiren til ein rein stad.

⁵Elden skal haldast brennande på altaret; han må ikkje slokna. Kvar morgon skal presten nøra elden med ved, leggja brennofferet til rettes på veden og brenna feittet av måltidsofferet.

⁶Det skal alltid brenna eld på altaret; han må ikkje slokna.

⁷Dette er lova om grødeofferet: Arons-sønene skal bera det fram for Herrens åsyn, fram til altaret.

⁸Presten skal ta ein neve av kveitemjølet og oljen i grødeofferet og all røykjelsen som er lagd på grødeofferet, og brenna det på altaret. Det er eit påminningsoffer til godange for Herren.

⁹Det som er att av offeret, skal Aron og sønene hans eta. Det skal etast usyrt på ein heilag stad. I føregarden til møteteltet skal dei eta det.

¹⁰Med surdeig må det ikkje bakast. Det er den delen eg har gjeve dei av eldoffera mine. Høgheilagt er det liksom syndofferet og skuldofferet.

¹¹Alle menn som er ætta frå Aron, kan eta det. Gjennom alle tider og ætter skal det vera dykkar del av Herrens eldoffer. Kvar den som rører ved det, vert heilag.

¹²Herren tala til Moses og sa:

¹³Dette er det offeret som Aron og sønene hans skal bera fram for Herren den dagen ein av dei vert salva: ein tiandedels efa kveitemjøl. Det er det daglege grødeofferet som dei ber fram, halvparten om morgonen og halvparten om kvelden.

¹⁴Med olje skal det lagast til på ei helle, og godt knatt skal det vera når dei kjem med det. Du skal dela det opp i småstykke og ofra det som grødeoffer, til godange for Herren.

¹⁵Den av Arons-sønene som vert salva til prest i staden hans, skal laga det til. Det er ei føresegn som Herren har gjeve for alle tider. Heile offeret skal brennast.

¹⁶Kvart grødeoffer som presten ber fram for seg sjølv, skal vera heiloffer, det må ikkje etast.

¹⁷Herren tala til Moses og sa:

¹⁸Sei til Aron og sønene hans: Dette er lova om syndofferet: På same staden som dei slaktar brennofferdyret, skal syndofferdyret òg slaktast for Herrens åsyn. Høgheilagt er det.

¹⁹Presten som ber fram syndofferet, skal eta det. På ein heilag stad skal det etast, i føregarden til møteteltet.

²⁰Kvar den som rører offerkjøtet, vert heilag. Kjem det noko av blodet på eit klesplagg, skal du vaska det på ein heilag stad.

²¹Vert kjøtet kokt i ei leirgryte, skal gryta knusast. Er det kokt i ein koparkjel, skal han skurast og skyljast med vatn.

²²Alle menn som er prestar, kan eta av dette offeret. Høgheilagt er det.

²³Men dei syndoffer som det vert bore blod av inn i møteteltet, så det vert gjort soning i heilagdomen, må ikkje etast. Dei skal brennast.