Read nynorsk 1978 3. Mosebok 9 Bible Online

3. Mosebok 9 - nynorsk 1978 bible

3. Mosebok 9

¹Den åttande dagen kalla Moses til seg Aron og sønene hans og dei eldste i Israel,

²og han sa til Aron: «Ta ein oksekalv til syndoffer og ein ver til brennoffer, begge utan lyte, og lei dei fram for Herrens åsyn!

³Og sei til israelittane: Ta ein bukk til syndoffer, ein kalv og eit lam, som begge er årsgamle og lytelause, til brennoffer,

⁴og ein okse og ein ver som skal vera måltidsoffer og ofrast for Herrens åsyn, og så eit grødeoffer med olje i! For i dag vil Herren syna seg for dykk.»

⁵Dei henta det som Moses hadde sagt, og sette det framfor møteteltet. Og heile Israels-lyden steig fram og stod for Herrens åsyn.

⁶Då sa Moses: «Dette er det Herren har sagt at de skal gjera; så skal Herrens herlegdom syna seg for dykk.»

⁷Og til Aron sa han: «Gå fram til altaret og ofra syndofferet og brennofferet ditt, og gjer soning for deg sjølv og for folket! Ber så fram offeret frå folket og gjer soning for dei, som Herren har sagt!»

⁸Så gjekk Aron fram til altaret og slakta kalven som skulle vera syndoffer for han sjølv.

⁹Sønene hans gav han blodet, og han duppa fingeren i blodet og strauk det på altarhorna. Det som var att av blodet, helte han ut nedmed altarfoten.

¹⁰Feittet, nyrene og leverlappen av syndofferdyret brende han på altaret, så som Herren hadde sagt Moses føre.

¹¹Men kjøtet og skinnet brende han opp utanfor leiren.

¹²Så slakta han brennofferdyret. Sønene hans gav han blodet, og han skvette det rundt ikring på altaret.

¹³Dei rette sjølve brennofferet til han, stykke for stykke, og hovudet, og han brende det på altaret.

¹⁴Innvolen og føtene vaska han og brende dei på altaret saman med brennofferet.

¹⁵Så bar han fram offeret frå folket. Han tok bukken som skulle vera syndoffer for folket, slakta han og ofra han som syndoffer, liksom det fyrste offerdyret.

¹⁶Sameleis førte han fram brennofferet og ofra det, som det var føreskrive.

¹⁷Grødeofferet bar han òg fram. Av det tok han ein neve og brende på altaret, forutan morgonbrennofferet.

¹⁸Og han slakta oksen og veren som skulle vera måltidsoffer for folket. Sønene hans gav han blodet, og han skvette det rundt ikring på altaret.

¹⁹Feittet på oksen og veren, både feitthalen, netja, begge nyrene med talga som var på dei, og leverlappen,

²⁰alt dette la dei på bryststykka. Og Aron brende feittet på altaret.

²¹Men bryststykka og det høgre låret svinga han for Herrens åsyn, så som Moses hadde sagt.

²²Aron lyfte hendene over folket og velsigna dei. Og så gjekk han ned, etter at han hadde bore fram syndofferet, brennofferet og måltidsofferet.

²³Sidan gjekk Moses og Aron inn i møteteltet, og då dei kom ut att, velsigna dei folket. Då synte Herrens herlegdom seg for heile folket,

²⁴og det fór ut eld frå Herren og brende opp det som var på altaret, både brennofferet og feittet. Då folket såg det, ropa dei alle høgt av glede og kasta seg til jorda.