Read nynorsk 1978 Jeremia 28 Bible Online

Jeremia 28 - nynorsk 1978 bible

Jeremia 28

¹Same året, i den fyrste tida etter at Sidkia hadde vorte konge i Juda, i det fjerde året, i den femte månaden, tala Hananja Assursson, profeten frå Gibeon, til meg i Herrens hus, medan prestane og alt folket høyrde på. Han sa:

²Så seier Herren, Allhærs Gud, Israels Gud: Eg bryt sund babylonarkongens åk.

³Før to år er lidne, fører eg attende til denne staden alle dei kar frå Herrens hus som Nebukadnesar, kongen i Babylonia, tok med seg herifrå til Babylon.

⁴Og Juda-kongen Jekonja, son til Jojakim, og alle dei bortførte frå Juda som kom til Babylonia, vil eg føra attende til denne staden, lyder ordet frå Herren; for eg bryt sund babylonarkongens åk.

⁵Då svara profeten Jeremia profeten Hananja, medan prestane og alt folket som stod i Herrens hus, høyrde på:

⁶«Ja, sanneleg, gjev Herren må gjera dette! Gjev Herren må setja i verk det du har spått og la tempelkara og alle dei bortførte koma attende til denne staden frå Babylonia.

⁷Men høyr no dette ordet som eg talar til deg og til alt folket.

⁸Dei profetane som steig fram før deg og meg, heilt frå gamle dagar, spådde krig og ulukke og pest for mektige land og store rike.

⁹Men når ein profet spår fred og lukke, og det går som han har sagt, då kan ein vita at han i sanning er send av Herren.»

¹⁰Då tok profeten Hananja åket av nakken på Jeremia og braut det sund.

¹¹Og Hananja sa, medan alt folket høyrde på: «Så seier Herren: Såleis vil eg, før to år er lidne, bryta babylonarkongen Nebukadnesars åk og ta det av nakken på alle folka.» Då gjekk profeten Jeremia sin veg.

¹²Men etter at profeten Hananja hadde teke åket av nakken på Jeremia og brote det sund, kom Herrens ord til Jeremia, og det lydde så:

¹³Gå og sei til Hananja: Så seier Herren: Eit treåk har du brote sund. Men eit jernåk skal du laga i staden.

¹⁴For så seier Herren, Allhærs Gud, Israels Gud: Eit jernåk legg eg over nakken på alle desse folkeslaga, så dei skal tena Nebukadnesar, babylonarkongen, og træla under han. Jamvel villdyra på marka gjev eg over til han.

¹⁵Då sa profeten Jeremia til profeten Hananja: «Høyr, Hananja! Herren har ikkje sendt deg. Og du har fått dette folket til å lita på lygn.

¹⁶Difor seier Herren: No sender eg deg, men bort frå jorda. Alt i år skal du døy, fordi du forkynte fråfall frå Herren.»

¹⁷Og profeten Hananja døydde same året, i den sjuande månaden.