Read nynorsk 1978 Jeremia 35 Bible Online

Jeremia 35 - nynorsk 1978 bible

Jeremia 35

¹Dette er det ordet som kom til Jeremia frå Herren på den tid Jojakim, son til Josjia, var konge i Juda. Det lydde så:

²Gå til rekabittane og tal til dei! Ta dei med deg til Herrens hus, til eit av roma der, og gjev dei vin å drikka! [78]

³Då tok eg med meg Ja’asanja, son til Jeremia Habasinjason, brørne hans og alle sønene hans og alle dei andre rekabittane.

⁴Eg førte dei inn i Herrens hus, i romet til læresveinane åt gudsmannen Hanan, son til Jigdalja. Det låg attmed hovdingromet, ovanfor romet åt dørvaktaren Ma’aseja, son til Sjallum.

⁵Så sette eg fram for rekabittane krukker, fulle av vin, og staup og bad dei drikka av vinen.

⁶Men dei svara: Vi drikk ikkje vin. For far vår, Jonadab Rekabsson, gav oss ikkje lov til det. Han sa: «De skal ikkje drikka vin, korkje de eller borna dykkar.

⁷De skal ikkje byggja hus eller så korn og ikkje planta eller eiga vingardar. I telt skal de bu all dykkar tid, så de kan få leva lenge i det landet der de er innflyttarar.»

⁸Sidan har vi vore lydige mot far vår, Jonadab Rekabsson, i alt det han baud oss å gjera. I heile vårt liv har vi ikkje drukke vin, korkje vi eller konene våre eller sønene eller døtrene våre.

⁹Vi byggjer ikkje hus til å bu i og har korkje vingardar, jorder eller såkorn,

¹⁰men bur i telt. Vi er lydige og gjer alt det far vår, Jonadab, baud oss.

¹¹Men då Nebukadnesar, babylonarkongen, drog fram mot landet, sa vi: «Kom, lat oss fara til Jerusalem, så vi kan sleppa unna kaldearhæren og aramearhæren.» Difor bur vi no i Jerusalem.

¹²Då kom Herrens ord til Jeremia, og det lydde så:

¹³Så seier Herren, Allhærs Gud, Israels Gud: Gå og sei til Juda-mennene og Jerusalems-buane: Vil de ikkje ta imot lærdom og høyra på mine ord? seier Herren.

¹⁴Jonadab Rekabsson gav læresveinane sine det bodet at dei ikkje skulle drikka vin, og det har dei halde. Til denne dag har dei ikkje drukke vin, men lydt påbodet frå far sin. Eg derimot har tala til dykk både seint og tidleg, men de ville ikkje høyra på meg.

¹⁵Gong på gong sende eg til dykk alle tenarane mine, profetane, og sa: «Vend om, kvar og ein frå si vonde ferd, og lat gjerningane dykkar betrast! Hald dykk ikkje til andre gudar og dyrk dei ikkje! Så skal de få bu i det landet eg gav dykk og fedrane dykkar.» Men de vende ikkje øyra til og ville ikkje høyra på meg.

¹⁶Ja, læresveinane åt Jonadab Rekabsson har nok halde det bodet som far deira gav dei, men dette folket ville ikkje høyra på meg.

¹⁷Difor seier Herren, Allhærs Gud, Israels Gud: Sjå, eg vil føra over Juda og Jerusalems-buane all den ulukka som eg har truga dei med. For dei høyrde ikkje då eg tala til dei, og svara ikkje då eg ropa til dei.

¹⁸Men til rekabittane sa Jeremia: Så seier Herren, Allhærs Gud, Israels Gud: De lydde bodet frå Jonadab, far dykkar, ja, heldt alle påboda hans og gjorde alt det han baud dykk,

¹⁹og difor, seier Herren, Allhærs Gud, Israels Gud, skal Jonadab Rekabsson aldri vanta menn som står i mi teneste.