Read nynorsk 1978 Esekiel 4 Bible Online

Esekiel 4 - nynorsk 1978 bible

Esekiel 4

¹Du menneske, ta ein murstein og legg han framfor deg! På den skal du rita ein by, Jerusalem. [14]

²Du skal kringsetja byen, byggja skansar mot han og kasta opp ein voll ikring han. Lat hærar leira seg rundt byen og set opp stormbukkar mot han på alle kantar!

³Ta så ei jernplate og set henne som ein jernvegg mellom deg og byen, og vend andletet mot byen! Såleis vert han kringsett, og du går til åtak på han. Det skal vera eit teikn for Israels-ætta.

⁴Så skal du leggja deg på venstre sida og leggja Israels skuld over på den. Like mange dagar som du ligg så, skal du bera skulda deira.

⁵Like mange år som dei har synda, like mange dagar lèt eg deg få, tre hundre og nitti dagar. Så lenge skal du bera Israels skuld.

⁶Når du er ferdig med desse dagane, skal du leggja deg att, no på høgre sida, og bera skulda åt Juda-folket. I førti dagar, éin dag for kvart år, lèt eg deg bera henne.

⁷Vend andletet mot det kringsette Jerusalem! Med berr arm skal du tala profetord mot byen!

⁸Sjå, eg bind deg med tog, så du ikkje kan snu deg frå den eine sida til den andre før du er ferdig med dei dagane du skal halda byen kringsett.

⁹Ta så kveite og bygg, bauner og linser, hirse og spelt, legg det opp i eit trog og bak brød av det! Så mange dagar som du ligg på sida, i tre hundre og nitti dagar, skal du eta av dette.

¹⁰Den maten du dagleg et, skal vega tjue sekel. Til faste tider skal du eta han.

¹¹Vatnet du drikk, skal mæla ein sjettedels hin. Til faste tider skal du drikka det.

¹²Brødet skal du eta som byggkaker. Du skal steikja det beint framfor augo deira med turka menneskemøk til brensel.

¹³Såleis skal israelittane eta ureint brød mellom dei folkeslag eg driv dei bort til, sa Herren.

¹⁴Eg svara: «Å, Herre Gud, eg har aldri vore urein. Frå min ungdom og heilt til no har eg aldri ete kjøt av sjølvdaude eller ihelrivne dyr. Og ureint offerkjøt har eg ikkje hatt i min munn.»

¹⁵Då sa han til meg: «Godt, i staden for menneskemøk lèt eg deg bruka kumøk til å steikja brødet ditt på.»

¹⁶Så sa han til meg: Menneske, no bryt eg sund brødstaven i Jerusalem. Med sut skal dei eta brød etter vekt, og med redsle skal dei drikka vatn etter mål. [15]

¹⁷Ja, dei skal sleppa opp for brød og vatn. Både den eine og den andre skal verta forstøkt og forgå på grunn av si synd og skuld.