Read nynorsk 1978 Esekiel 40 Bible Online

Esekiel 40 - nynorsk 1978 bible

Esekiel 40

¹I det tjuefemte året etter at vi vart bortførte — det var det fjortande året etter at byen vart teken — ved nyårsleite, den tiande dagen i månaden, då kom Herrens hand over meg og førte meg bort [115]

²i syner frå Gud. Han tok meg med til Israel og sette meg ned på eit veldig høgt fjell. Der var det i sør liksom ein bygning i ein by.

³Dit førte han meg. Sjå, der var det ein mann som var lik bronse å sjå til. Han stod i porten og hadde ei linsnor og ei mælestong i handa. [116]

⁴Mannen sa til meg: Menneske, bruk augo og øyro og legg merke til alt det eg lèt deg sjå. Du er ført hit, så eg kan få syna deg det. Alt det du ser, skal du fortelja til Israels-ætta.

⁵Utanfor templet var det ein mur på alle kantar. Mannen hadde ei mælestong i handa; ho var seks alner lang, når kvar alen er ei handsbreidd lengre enn den vanlege. Han mælte byggverket, som var ei mælestong tjukt og ei mælestong høgt. [117]

⁶Så kom han til den porten som vender mot aust. Han gjekk opp troppestega i porten og mælte dørstokken der; han var ei mælestong brei. Det var den fyrste dørstokken.

⁷Kvart siderom var ei mælestong langt og ei mælestong breitt, og mellom roma var det fem alner. Dørstokken til forhalla inst i porten var ei mælestong.

⁸Han mælte sjølve forhalla i porten;

⁹ho var åtte alner, og søylene der var to alner. Forhalla i porten vende inn mot templet.

¹⁰Det var tre rom på kvar side av austporten, og alle hadde same mål. Pilarane på begge sider var òg like store.

¹¹Mannen mælte breidda på portopninga: ti alner, og breidda på sjølve porten: tretten alner.

¹²Framfor sideroma var det eit rekkverk; kvart gitter mælte ei alen. Og sjølve sideroma var seks alner på kvar kant.

¹³Så mælte han porten frå takkanten i det eine sideromet til takkanten i det andre; han var tjuefem alner brei. Opningane inn til sideroma låg midt for kvarandre. —

¹⁴Han mælte forhalla; ho var tjue alner. Og rundt ikring forhalla var føregarden. — [118]

¹⁵Frå inngangen ytst i porten til framsida av forhalla inst i porten var det femti alner.

¹⁶Inne i porten, i alle sideroma, var det vindaugo med gitter, som nådde bort til veggpilarane mellom dei. Like eins var det vindaugo på begge sider i forhalla. På pilarane var det palmer.

¹⁷Så førte han meg til den ytre føregarden. Sjå, det var fleire rom og eit steinlagt golv rundt ikring i føregarden; og på golvet var det tretti rom.

¹⁸Steingolvet låg attmed portane og nådde like langt ut som dei. Det er det nedste steingolvet.

¹⁹Han mælte føregarden mellom framsida av den nedre porten og framsida av den indre porten, den som vender utover, og det var hundre alner. Det var austporten, og så kjem nordporten.

²⁰Han mælte lengda og breidda på den porten som vende mot nord i den ytre føregarden.

²¹Sideroma, tre på kvar side, og pilarane og forhalla hadde dei same mål som i den fyrste porten. Han var femti alner lang og tjuefem alner brei.

²²Vindaugo, forhalla og palmene der var like store som i porten mot aust. På sju troppesteg kom ein dit opp; og forhalla låg innanfor.

²³I den indre føregarden var det ein port midt for nordporten, som det var i aust òg. Frå port til port mælte han hundre alner.

²⁴Så førte mannen meg mot sør. Og sjå, der var det ein port som vende sørover. Han mælte pilarane og forhalla der òg; dei hadde same mål som dei andre.

²⁵Både porten og forhalla i porten hadde vindaugo på begge sider, og dei var som dei andre vindaugo. Han var femti alner lang og tjuefem alner brei.

²⁶Sju troppesteg førte opp til porten, og forhalla låg innanfor. På pilarane var det palmer, ei på kvar side.

²⁷I den indre føregarden var det ein port mot sør òg. Mannen mælte avstanden frå port til port, hundre alner.

²⁸Så førte han meg til den indre føregarden gjennom porten i sør. Han mælte sørporten, og han var like stor som dei andre.

²⁹Sideroma, pilarane og forhalla der hadde same mål som dei andre. Både porten og forhalla i porten hadde vindaugo på begge sider. Han var femti alner lang og tjuefem alner brei. —

³⁰Rundt ikring var det forhaller, tjuefem alner lange og fem alner breie. —

³¹Forhalla vende ut mot den ytre føregarden. På pilarane var det palmer; og åtte troppesteg førte dit opp.

³²Så førte han meg til den indre føregarden gjennom porten i aust. Han mælte porten, og han hadde same mål som dei andre.

³³Sideroma, pilarane og forhalla der var like store som dei andre. Både porten og forhalla i porten hadde vindaugo på begge sider. Han var femti alner lang og tjuefem alner brei.

³⁴Forhalla vende ut mot den ytre føregarden. På pilarane var det palmer, ei på kvar side; og åtte troppesteg førte dit opp.

³⁵Så førte han meg til porten i nord. Han mælte porten, og han var like stor som dei andre.

³⁶Like eins hadde sideroma, pilarane og forhalla dei same mål, og det var vindaugo på begge sider. Porten var femti alner lang og tjuefem alner brei.

³⁷Forhalla vende ut mot den ytre føregarden. På pilarane var det palmer, ei på kvar side; og åtte troppesteg førte dit opp.

³⁸Frå forhalla i porten var det inngang til eit rom der dei kunne skylja brennofferet.

³⁹Og i forhalla stod det to bord på kvar side. På dei skulle dei slakta brennofferet, syndofferet og skuldofferet.

⁴⁰Utanfor sideveggen, nær oppgangen til nordporten, stod det òg to bord. Og på den andre sida av forhalla stod det to bord.

⁴¹Til saman var det fire bord ved kvar sidevegg i porten, i alt åtte bord. Der skulle dei slakta offerdyr.

⁴²Dei fire borda til brennofferet var av tilhoggen stein; dei var halvanna alen lange, halvanna alen breie og ei alen høge. På dei la dei reiskapen dei bruka når dei slakta brennofferet og slaktofferet.

⁴³Rundt ikring i bygningen var det fest hyller, som mælte ei handsbreidd. På borda la dei det kjøtet som skulle ofrast.

⁴⁴Utanfor den indre porten, i den indre føregarden, var det to rom. Det eine låg attmed sideveggen i nordporten, som vender mot sør, det andre attmed den sideveggen i austporten som vender mot nord.

⁴⁵No tala mannen til meg og sa: «Dette romet, som vender mot sør, er for dei prestane som gjer teneste i templet.

⁴⁶Og det romet som vender mot nord, er for dei prestane som gjer teneste ved altaret. Det er Sadok-sønene, dei av Levi-ætlingane som kan stiga fram for Herren og tena han.» [119]

⁴⁷Mannen mælte føregarden; han var firkanta, hundre alner lang og hundre alner brei. Framfor templet stod altaret.

⁴⁸Så førte han meg til forhalla i templet og mælte pilarane der; dei var fem alner på kvar side. Portopninga var fjorten alner brei, og veggene på begge sider var tre alner.

⁴⁹Forhalla var tjue alner lang og tolv alner brei. Ti troppesteg førte dit opp. Attmed veggpilarane stod det søyler, ei på kvar side.