Read nynorsk 1978 Esekiel 48 Bible Online

Esekiel 48 - nynorsk 1978 bible

Esekiel 48

¹Dette er namna på ættene. Lengst i nord, langs vegen til Hetlon, Lebo-Hamat og Hasar-Enon, ved grensa mot Damaskus i nord og langsmed Hamat, frå aust til vest, skal Dan ha éin lut.

²Langs Dans-landet, frå aust til vest, skal Asjer ha éin lut.

³Langs Asjers-landet, frå aust til vest, skal Naftali ha éin lut.

⁴Langs Naftali-landet, frå aust til vest, skal Manasse ha éin lut.

⁵Langs Manasse-landet, frå aust til vest, skal Efraim ha éin lut.

⁶Langs Efraims-landet, frå aust til vest, skal Ruben ha éin lut.

⁷Langs Rubens-landet, frå aust til vest, skal Juda ha éin lut.

⁸Langs Juda-landet, frå aust til vest, skal de skilja ut eit serskilt landområde. Det skal vera tjuefem tusen alner breitt og så langt som kvar av dei andre lutene, frå austsida til vestsida. Og midt i det skal heilagdomen liggja.

⁹Det området de vier som heilag gåve til Herren, skal vera tjuefem tusen alner langt og tjue tusen alner breitt.

¹⁰Det heilage området skal høyra desse til: Prestane skal ha eit stykke som er tjuefem tusen alner langt både i nord og sør og ti tusen alner breitt både i vest og aust. Og midt på det skal heilagdomen liggja.

¹¹Prestane, dei av Sadok-sønene som er vigsla, dei som sytte for tempeltenesta, og som ikkje fór vilt saman med israelittane så som levittane gjorde,

¹²dei skal ha sin del av det landet som er vigt til heilag gåve, ein høgheilag del, attmed landet åt levittane.

¹³Levittane skal ha eit like stort stykke som prestane, tjuefem tusen alner langt og ti tusen alner breitt. Heile området skal vera tjuefem tusen alner langt og tjue tusen alner breitt.

¹⁴Dei skal ikkje selja eller byta bort noko av dette. Den beste delen av landet må ikkje gå over til andre; for han er heilag for Herren.

¹⁵Det fem tusen alner breie stykket som er att av det tjuefem tusen alner lange området, skal ikkje vera heilagt; byen skal bruka det til bustader og beitemarker. Og midt i det skal byen liggja.

¹⁶Desse måla skal byen ha: nordsida fire tusen fem hundre alner, sørsida fire tusen fem hundre, austsida fire tusen fem hundre og vestsida fire tusen fem hundre.

¹⁷Beitemarkene kring byen skal vera to hundre og femti alner breie i nord, to hundre og femti i sør, to hundre og femti i aust og to hundre og femti i vest.

¹⁸Av det som er att langs det heilage området, ti tusen alner breitt både i aust og vest, skal grøda brukast til mat for arbeidarane i byen.

¹⁹Arbeidarar frå alle Israels-ættene som bur der, skal dyrka det.

²⁰Heile det utskilde området skal vera tjuefem tusen alner på kvar kant. Det stykket de set av til eigedom for byen, skal vera fjerdeparten av det heilage området.

²¹Fyrsten skal ha det som er att på begge sider av det heilage området og det som høyrer byen til. Det skal gå langs det tjuefem tusen alner lange området til grensa i aust og vestover langs det same området til grensa i vest, attmed lutene åt ættene. Det skal høyra fyrsten til. Og midt imellom skal det utskilde området med tempelheilagdomen liggja.

²²Bortsett frå eigedomen åt levittane og eigedomen åt byen, som ligg mellom dei lutene fyrsten får, skal heile området mellom Juda-landet og Benjamins-landet høyra fyrsten til.

²³Så kjem dei andre ættene: Benjamin, frå aust til vest éin lut;

²⁴langs Benjamins-landet frå aust til vest: Simeon éin lut;

²⁵langs Simeons-landet frå aust til vest: Jissakar éin lut;

²⁶langs Jissakars-landet frå aust til vest: Sebulon éin lut,

²⁷og langs Sebulons-landet frå aust til vest: Gad éin lut.

²⁸Langs Gads-landet, på sørsida, skal grensa mot sør gå frå Tamar til Meribat-Kadesj og så til Egyptarbekken og Storhavet.

²⁹Dette er det landet som de skal skifta ut mellom Israels-ættene. Dei skal ha det til odel og eige, og dette er dei lutene dei skal få, lyder ordet frå Herren Gud.

³⁰Desse utgangane skal byen ha: På nordsida, som mæler fire tusen fem hundre alner,

³¹skal det vera tre portar — og byportane skal ha namn etter Israels-ættene: Rubens-porten, Juda-porten og Levi-porten;

³²på austsida, som mæler fire tusen fem hundre alner, tre portar: Josefs-porten, Benjamins-porten og Dans-porten;

³³på sørsida, som mæler fire tusen fem hundre alner, tre portar: Simeons-porten, Jissakars-porten og Sebulons-porten,

³⁴og på vestsida, som òg mæler fire tusen fem hundre alner, tre portar: Gads-porten, Asjers-porten og Naftali-porten.

³⁵Byen skal ha ein omkrins på atten tusen alner. Heretter skal byen bera namnet «Herren er der».