Read nynorsk 1978 Esekiel 5 Bible Online

Esekiel 5 - nynorsk 1978 bible

Esekiel 5

¹Du menneske, ta eit kvast sverd, bruk det til rakekniv på deg, og far over hovudet og skjegget med det! Ta så ei skålvekt og del både hår og skjegg! [16]

²Ein tredjepart skal du brenna midt i byen, når kringsetjingsdagane er over; ein tredjepart skal du ta og hogga opp med sverdet rundt ikring byen, og ein tredjepart skal du spreia for vinden. Med drege sverd vil eg setja etter dei.

³Nokre få hår skal du ta unna og samla i kappesnippen din.

⁴Av dei skal du ta nokre, kasta dei midt inn i elden og brenna dei opp. Derifrå skal elden spreia seg over heile Israels-ætta.

⁵Så seier Herren Gud: Denne byen, Jerusalem, har eg sett midt imellom folkeslaga, og landa har eg lagt ikring han.

⁶Men folket der sette seg opp mot lovene mine og var ugudelegare enn dei andre folka; dei trassa føreskriftene mine meir enn landa ikring. For dei vraka lovene mine og fylgde ikkje føreskriftene mine.

⁷Difor seier Herren Gud: De har rasa verre enn folkeslaga rundt ikring dykk. For mine føreskrifter har de ikkje fylgt, og mine lover har de ikkje halde. De har ikkje eingong levt etter lovene åt grannefolka dykkar.

⁸Difor seier Herren Gud: Sjå, no kjem eg imot deg. Eg vil halda dom hjå deg for augo på dei andre folka.

⁹Fordi du har gjort så mykje stygt, vil eg gjera mot deg noko som eg ikkje før har gjort og aldri meir kjem til å gjera.

¹⁰Difor skal foreldre hjå deg eta borna sine, og born skal eta foreldra sine. Eg held dom hjå deg, og dei som då vert att, spreier eg for alle vindar.

¹¹Difor, så sant eg lever, lyder ordet frå Herren Gud, fordi du har gjort heilagdomen min urein med alle dei ufyselege gudane dine og all styggedomen din, skal eg sanneleg hogga deg ned. Eg vil ikkje visa medkjensle eller skånsel.

¹²Ein tredjepart av dykk skal døy av pest eller gå til av svolt i byen, ein tredjepart skal falla for sverd rundt ikring han, og ein tredjepart vil eg spreia for alle vindar og forfylgja med drege sverd.

¹³Min vreide skal få fritt løp. Eg vil stilla min harme på dei og ta hemn. Då skal dei sanna at eg, Herren, har tala i min brennhug, når eg lèt all min harme gå ut over dei.

¹⁴Eg gjer deg til ein grushaug, til spott for folka som bur ikring deg, så alle som fer framom, kan sjå det.

¹⁵Du skal verta til spott og hån, til skrekk og åtvaring for grannefolka, når eg held dom over deg med vreide og harme og hard tukt. Eg, Herren, har tala.

¹⁶Då sender eg inn imellom dykk dei vonde hungerspilene som er etla til å tyna. Eg sender dei for å tyna dykk. Eg lèt hungeren verta hard og bryt sund brødstaven for dykk.

¹⁷Svolt og udyr sender eg mot deg, og dei skal gjera deg barnlaus. Pest og drap skal heimsøkja deg, og eg sender sverd imot deg. Eg, Herren, har tala.