Read nynorsk 1978 Joel 1 Bible Online

Joel 1 - nynorsk 1978 bible

Joel 1

¹Dette er Herrens ord som kom til Joel, son til Petuel.

²Høyr dette, de eldste, lyd etter, alle som bur i landet: Har slikt hendt før i dykkar tid, eller då dykkar fedrar levde?

³Fortel om det til borna dykkar, og dei skal fortelja det ¬til sine born, som skal fortelja det ¬til den ætt som kjem.

⁴Det åma leivde, ¬åt grashoppa opp, det grashoppa leivde, ¬åt larva opp, det larva leivde, ¬åt gnagaren opp.

⁵Vakna, de drukne, og gråt! Klag, alle de som drikk vin, over druesaft ¬de ikkje fekk smaka!

⁶For eit folk har drege opp ¬mot mitt land, sterkt og utan tal. Tenner har dei som ei løve, og kjeve som ei løvinne. [1]

⁷Dei la mine vintre aude og braut ned fikentrea, flekte borken, reiv lauvet av, så greinene vart kvite.

⁸Klag som ei syrgjekledd møy klagar over ¬sin ungdoms brudgom!

⁹Grødeoffer og drikkoffer kjem bort frå Herrens hus. Prestane, Herrens tenarar, ¬syrgjer.

¹⁰Markene er herja, jorda sturer. For kornet er øydelagt, ¬vinen innturka, og oljen er borte.

¹¹Bøndene er vonbrotne, og vindyrkarane klagar over kveiten og bygget; for det finst ikkje grøde ¬på marka.

¹²Vintreet turka, ¬fikentreet visna. Granatepletre, palme og apal, kvart tre på marka ¬har turka bort; all glede er kvorven ¬mellom menneska.

¹³Kled dykk i syrgjebunad og hald klage, de prestar, skrik, de som gjer teneste ¬ved altaret! Gå inn og vak i syrgjeklede, de som tener min Gud. For grødeoffer og drikkoffer kjem ikkje til dykkar Guds hus.

¹⁴Lys ut ei faste, og kunngjer høgtidssamling! Kall saman dei eldste, ja, alle som bur i landet, til Herren dykkar Guds hus, og rop så til Herren:

¹⁵Ve oss, for ein dag! Ja, nær er Herrens dag! Han kjem med øyding ¬frå Den Allmektige.

¹⁶Vart ikkje maten borte ¬for augo våre, glede og jubel ¬frå vår Guds hus?

¹⁷Såkornet ligg innturka i jorda. Bingane er øydelagde, ¬låvane rivne, for kornet er borte.

¹⁸Kor buskapen rautar! Bølingen flakkar ikring, for dei har ikkje beite. Jamvel saueflokkane må lida.

¹⁹Herre, eg ropar til deg. For heten har gjort ende på beita i øydemarka. Solbrann har svidt av ¬kvart tre på marka.

²⁰Jamvel villdyra styn ¬opp mot deg, for bekkefara er turre, og heten har gjort ende på beita i øydemarka.