Read nynorsk 1978 Jona 3 Bible Online

Jona 3 - nynorsk 1978 bible

Jona 3

¹Då kom Herrens ord til Jona andre gongen, og det lydde så:

²«Stå opp, gå til Ninive, den store byen, og rop ut over han den bodskapen eg gjev deg!»

³Jona stod opp og gjekk til Ninive, som Herren hadde sagt. Ninive var ein stor by for Gud, tre dagsleier lang.

⁴Jona gjekk ei dagslei inn i byen og ropa: «Om førti dagar skal Ninive leggjast i grus!»

⁵Då trudde folket i Ninive på Gud. Dei lyste ut faste og kledde seg i botsdrakt, både store og små.

⁶Kongen i Ninive fekk òg høyra om dette. Då reiste han seg frå tronstolen sin og tok av seg kongekåpa. Han kledde seg i botsdrakt og sette seg i støvet.

⁷Etter påbod frå kongen og stormennene hans ropa dei ut i Ninive: «Korkje menneske eller dyr, korkje storfe eller småfe skal eta noko; dei skal ikkje beita og ikkje drikka vatn.

⁸Men dei skal kle seg i botsdrakt, både menneske og dyr, og ropa til Gud av all makt og venda om frå si vonde ferd og den urett dei gjer.

⁹Kan henda Gud då vil endra sin plan og halda att sin brennande vreide, så vi ikkje går til grunne.»

¹⁰Dei vende om frå si vonde ferd, og då Gud såg det, endra han sin plan og sende ikkje den ulukka han hadde varsla.