Read nynorsk 1978 4. Mosebok 1 Bible Online

4. Mosebok 1 - nynorsk 1978 bible

4. Mosebok 1

¹Den fyrste dagen i den andre månaden året etter at israelittane hadde fare frå Egypt, medan dei var i Sinai-øydemarka, tala Herren til Moses i møteteltet. Han sa:

²Hald manntal over heile Israels-folket, kvar ætt og kvar ættgrein for seg, og skriv opp namna på alle menn, eitt for eitt.

³Du og Aron skal mønstra alle våpenføre menn i Israel som er tjue år eller meir, kvar flokk for seg.

⁴De skal ta med dykk ein mann for kvar ætt, han som er hovding over greinene i ætta.

⁵Dette er namna på dei mennene som skal hjelpa dykk: Frå Ruben: Elisur, son til Sjede’ur;

⁶frå Simeon: Sjelumiel, son til Surisjaddai;

⁷frå Juda: Naksjon, son til Amminadab;

⁸frå Jissakar: Netanel, son til Suar;

⁹frå Sebulon: Eliab, son til Helon;

¹⁰frå Josefs-sønene: Elisjama, son til Ammihud, for Efraim, og Gamliel, son til Pedasur, for Manasse;

¹¹frå Benjamin: Abidan, son til Gidoni;

¹²frå Dan: Akieser, son til Ammisjaddai;

¹³frå Asjer: Pagiel, son til Okran;

¹⁴frå Gad: Eljasaf, son til De’uel;

¹⁵frå Naftali: Akira, son til Enan.

¹⁶Dette er dei mennene som folket har valt, leiarane for dei ættene som fedrane deira tilhøyrde, ættehovdingane i Israel.

¹⁷Moses og Aron tok med seg desse mennene som er nemnde med namn.

¹⁸Så kalla dei heile folket saman, den fyrste dagen i den andre månaden. Dei vart innførte i listene over ætter og ættgreiner; alle som var tjue år eller meir, vart innskrivne, ein for ein.

¹⁹Såleis mønstra Moses folket i Sinai-øydemarka, som Herren hadde sagt.

²⁰Etterkomarane etter Ruben, eldste son til Israel, vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne, ein for ein.

²¹46 500 vart mønstra i Rubens-ætta.

²²Etterkomarane etter Simeon vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne, ein for ein.

²³59 300 vart mønstra i Simeons-ætta.

²⁴Etterkomarane etter Gad vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne.

²⁵45 650 vart mønstra i Gads-ætta.

²⁶Etterkomarane etter Juda vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne.

²⁷74 600 vart mønstra i Juda-ætta.

²⁸Etterkomarane etter Jissakar vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne.

²⁹54 400 vart mønstra i Jissakars-ætta.

³⁰Etterkomarane etter Sebulon vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne.

³¹57 400 vart mønstra i Sebulons-ætta.

³²Etterkomarane etter Efraim, son til Josef, vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne.

³³40 500 vart mønstra i Efraims-ætta.

³⁴Etterkomarane etter Manasse vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne.

³⁵32 200 vart mønstra i Manasse-ætta.

³⁶Etterkomarane etter Benjamin vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne.

³⁷35 400 vart mønstra i Benjamins-ætta.

³⁸Etterkomarane etter Dan vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne.

³⁹62 700 vart mønstra i Dans-ætta.

⁴⁰Etterkomarane etter Asjer vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne.

⁴¹41 500 vart mønstra i Asjers-ætta.

⁴²Etterkomarane etter Naftali vart innførte i listene, ætt for ætt og ættgrein for ættgrein. Alle våpenføre menn som var tjue år eller meir, vart innskrivne.

⁴³53 400 vart mønstra i Naftali-ætta.

⁴⁴Dette var dei som vart mønstra av Moses og Aron og Israels hovdingar. Hovdingane var tolv i talet, ein for kvar ætt.

⁴⁵Alle israelittane vart mønstra, kvar ættgrein for seg, alle våpenføre menn som var tjue år eller meir.

⁴⁶Det var i alt 603 550 som vart mønstra.

⁴⁷Levittane vart ikkje mønstra saman med dei andre ættene.

⁴⁸For Herren sa til Moses:

⁴⁹Berre Leviætta skal du ikkje mønstra. Dei skal du ikkje ta med i manntalet saman med dei andre israelittane.

⁵⁰Men set levittane til å ha tilsyn med lovteltet, med alle tinga der og alt som elles høyrer til. Dei skal bera teltet og all bunaden som er i det. Dei skal gjera teneste i teltet og liggja i leir kring det.

⁵¹Når teltet skal flyttast, skal levittane ta det ned. Og når det skal reisast, skal levittane setja det opp. Kjem nokon annan nær det, må han døy.

⁵²Israelittane skal halda seg i kvar sin leir, under kvar si fane og i kvar sin flokk.

⁵³Men levittane skal liggja i leir kring lovteltet, så Guds vreide ikkje skal koma over Israels-folket. Og levittane skal ta seg av tenesta i lovteltet.

⁵⁴Israelittane gjorde alt dette så som Herren hadde sagt Moses føre.