Read nynorsk 1978 4. Mosebok 13 Bible Online

4. Mosebok 13 - nynorsk 1978 bible

4. Mosebok 13

¹Herren tala til Moses og sa:

²«Send nokre menn for å speida ut Kanaan-landet, som eg vil gje israelittane. Ein mann for kvar fedreætt skal de senda, og alle skal vera hovdingar.»

³Så sende Moses ut nokre menn frå Paran-øydemarka, som Herren hadde sagt, og alle var hovdingar mellom israelittane.

⁴Dette er namna på speidarane: for Rubens-ætta Sjammua, son til Sakkur;

⁵for Simeons-ætta Sjafat, son til Hori;

⁶for Juda-ætta Kaleb, son til Jefunne;

⁷for Jissakars-ætta Jigal, son til Josef;

⁸for Efraims-ætta Hosea, son til Nun;

⁹for Benjamins-ætta Palti, son til Rafu;

¹⁰for Sebulons-ætta Gaddiel, son til Sodi;

¹¹for Josefs-ætta, det vil seia Manasse-ætta, Gaddi, son til Susi;

¹²for Dans-ætta Ammiel, son til Gemalli;

¹³for Asjers-ætta Setur, son til Mikael;

¹⁴for Naftali-ætta Nakbi, son til Vofsi;

¹⁵for Gads-ætta Ge’uel, son til Maki.

¹⁶Det var namna på dei mennene som Moses sende for å speida ut landet. Men han gav Hosea, son til Nun, namnet Josva. [16]

¹⁷Då Moses sende dei av stad for å speida ut Kanaan-landet, sa han til dei: «Far opp til Negev, og ta så opp i fjellet!

¹⁸Sjå korleis landet er laga, og om folket som bur der, er sterkt eller veikt, lite eller stort.

¹⁹Korleis er det landet dei bur i, er det godt eller ringt? Kva slag byar held dei til i, er det leirar eller festningsbyar?

²⁰Og korleis er jorda, feit eller skrinn? Veks det tre der eller ikkje? Ver modige og ta med dykk noko av frukta i landet!» Det var på den tid då dei fyrste druene vart mogne.

²¹Så tok dei av stad og speida ut landet frå Sin-øydemarka til Rehob ved Lebo-Hamat. [17] [18]

²²Dei fór opp gjennom Negev og kom til Hebron. Der budde anakittane Akiman, Sjesjai og Talmai. — Hebron var bygt sju år før Soan i Egypt. [19]

²³Då dei kom til Esjkol-dalen, skar dei av ei vinranke med ein drueklase. To mann laut bera han mellom seg på ei stong. Dei tok òg med seg nokre granateple og fikenar. [20]

²⁴Den staden vart sidan kalla Esjkol-dalen, etter den drueklasen som israelittane skar av der.

²⁵Då det leid av førti dagar, kom dei attende etter å ha speida ut landet.

²⁶Dei fann Moses og Aron og heile Israels-folket i Kadesj i Paran-øydemarka. Dei gav melding til dei og til alle som var samla, og synte dei frukta frå landet.

²⁷Til Moses sa dei: «Vi kom inn i det landet du sende oss til. Det fløymer med mjølk og honning, og her er frukta som veks der.

²⁸Men folket som bur i landet, er sterkt, og byane er som borger og sværande store. Der såg vi anakittar òg.

²⁹I Negev bur det amalekittar, i fjell-landet hetittar, jebusittar og amorittar, og utmed havet og langs Jordan bur kanaanearane.»

³⁰Då tok folket til å murra mot Moses, men Kaleb stagga dei og sa: «Vi vil fara opp og leggja landet under oss. Vi skal nok ta det.»

³¹Men dei mennene som hadde vore med han, sa: «Vi kan ikkje gå imot dette folket, for dei er sterkare enn vi.»

³²Den meldinga dei gav israelittane om det landet dei hadde speida ut, var nedslåande. Dei sa: «Det landet vi fór igjennom og speida ut, er eit land som gjer ende på dei som slår seg ned i det. Og alle mennene vi såg der, var store og sterke.

³³Der såg vi kjemper òg, anakittar av kjempeætt. Vi tykte at vi var som grashopper mot dei, og det tykte nok dei òg.»