Read nynorsk 1978 4. Mosebok 2 Bible Online

4. Mosebok 2 - nynorsk 1978 bible

4. Mosebok 2

¹Herren sa til Moses og Aron:

²Israelittane skal liggja i leir, kvar under si fane og sitt ættemerke. Leiren skal vera kring møteteltet, eit stykke frå det.

³På framsida, mot aust, skal Juda-hæren liggja, flokk for flokk. Naksjon, son til Amminadab, er hovding over Juda-sønene,

⁴og 74 600 er mønstra i fylkinga hans.

⁵Attmed dei skal Jissakars-ætta liggja. Netanel, son til Suar, er hovding over Jissakars-sønene,

⁶og 54 400 er mønstra i fylkinga hans.

⁷Så kjem Sebulons-ætta. Eliab, son til Helon, er hovding over Sebulons-sønene,

⁸og 57 400 er mønstra i fylkinga hans.

⁹Dei som er mønstra i Juda-hæren, flokk for flokk, er 186 400. Det er den fyrste fylkinga som skal ta ut.

¹⁰Mot sør skal Rubens-hæren liggja, flokk for flokk. Elisur, son til Sjede’ur, er hovding over Rubens-sønene,

¹¹og 46 500 er mønstra i fylkinga hans.

¹²Attmed dei skal Simeons-ætta liggja. Sjelumiel, son til Surisjaddai, er hovding over Simeons-sønene,

¹³og 59 300 er mønstra i fylkinga hans.

¹⁴Så kjem Gads-ætta. Eljasaf, son til De’uel, er hovding over Gads-sønene,

¹⁵og 45 650 er mønstra i fylkinga hans.

¹⁶Dei som er mønstra i Rubens-hæren, flokk for flokk, er i alt 151 450. Det er den andre fylkinga som skal ta ut.

¹⁷Så skal levitt-hæren, midt imellom dei andre, ta ut med møteteltet. Etter som dei har lege i leir, skal dei fara i veg, kvar mann på sin stad og under si fane.

¹⁸Mot vest skal Efraims-hæren liggja, flokk for flokk. Elisjama, son til Ammihud, er hovding over Efraims-sønene,

¹⁹og 40 500 er mønstra i fylkinga hans.

²⁰Attmed dei kjem Manasse-ætta. Gamliel, son til Pedasur, er hovding over Manasse-sønene,

²¹og 32 200 er mønstra i fylkinga hans.

²²Så kjem Benjamins-ætta. Abidan, son til Gidoni, er hovding over Benjamins-sønene,

²³og 35 400 er mønstra i fylkinga hans.

²⁴Dei som er mønstra i Efraims-hæren, flokk for flokk, er i alt 108 100. Det er den tredje fylkinga som skal ta ut.

²⁵Mot nord skal Dans-hæren liggja, flokk for flokk. Akieser, son til Ammisjaddai, er hovding over Dans-sønene,

²⁶og 62 700 er mønstra i fylkinga hans.

²⁷Attmed dei skal Asjers-ætta liggja. Pagiel, son til Okran, er hovding over Asjers-sønene,

²⁸og 41 500 er mønstra i fylkinga hans.

²⁹Så kjem Naftali-ætta. Akira, son til Enan, er hovding over Naftali-sønene,

³⁰og 53 400 er mønstra i fylkinga hans.

³¹Dei som er mønstra i Dans-hæren, er i alt 157 600. Det er den siste fylkinga som skal ta ut, under fanene sine.

³²Dette var dei israelittane som vart mønstra, kvar i si ættgrein. Talet på alle dei som vart mønstra i hærane, flokk for flokk, var 603 550.

³³Levittane vart ikkje mønstra saman med dei andre israelittane. Som Herren hadde sagt Moses føre,

³⁴så gjorde israelittane. Dei slo leir, kvar under si fane, og dei tok i veg, kvar i si ætt og si ættgrein, heilt og fullt som Herren hadde sagt Moses føre.