Read nynorsk 1978 4. Mosebok 23 Bible Online

4. Mosebok 23 - nynorsk 1978 bible

4. Mosebok 23

¹Då sa Bileam til Balak: «Bygg sju altar for meg her, og få tak i sju oksar og sju verar til meg!»

²Balak gjorde som Bileam sa, og dei ofra ein okse og ein ver på kvart altar.

³Så sa Bileam til Balak: «Stå her attmed brennoffera dine medan eg går bort ei stund. Kanskje Herren kjem til møtes med meg. Og det han lèt meg sjå, skal eg kunngjera deg.» Så gjekk han opp på ei snau høgd.

⁴Der kom Gud til møtes med Bileam, og Bileam sa til han: «No har eg stelt til sju altar, og på kvart altar har eg ofra ein okse og ein ver.»

⁵Då la Herren eit ord i munnen på Bileam og sa: «Gå attende til Balak og tal det eg har sagt.»

⁶Då han kom attende, såg han at Balak stod bortmed brennoffera sine saman med alle Moabs hovdingar.

⁷Så tok han til å kveda: Frå austerfjell, frå Aram, har Balak, Moabs konge, ¬henta meg: «Kom og lys forbanning ¬over Jakob, kom og tal vondt mot Israel!» [40]

⁸Korleis kan eg forbanna den som Gud ikkje har forbanna? Korleis kan eg vera harm ¬på den som Herren ikkje er harm på?

⁹Eg ser dei frå den høgste nut og skodar dei frå høgdene. Det er eit folk ¬som bur for seg sjølv og ikkje reknar seg ¬som andre folkeslag.

¹⁰Kven kan telja Jakob, ¬tallaus som støvkorn, kven kjenner talet ¬på Israels støvsky? Gjev eg fekk døy ¬som dei rettvise døyr, og til sist fekk ein lagnad ¬som dei!

¹¹Då sa Balak til Bileam: «Kva er det du gjer? Eg henta deg for at du skulle forbanna fiendane mine, og så velsignar du dei i staden!»

¹²Bileam svara: «Eg må ta meg i vare så eg ikkje talar anna enn det Herren legg meg i munnen.»

¹³Då sa Balak til han: «Kom og ver med meg til ein annan stad der du kan sjå folket. Men heile leiren får du ikkje sjå, berre utkanten av han. Derifrå skal du forbanna dei for meg.»

¹⁴Så tok han Bileam med seg til vakthaugen på toppen av Pisga-fjellet. Der bygde han sju altar, og på kvart altar ofra han ein okse og ein ver.

¹⁵Bileam sa til Balak: «Stå her attmed brennoffera dine, medan eg går bort og møter Gud.»

¹⁶Herren møtte Bileam og la eit ord i munnen hans. «Gå attende til Balak,» sa han, «og tal det eg seier deg!»

¹⁷Då Bileam kom attende, såg han at Balak stod attmed brennoffera sine og Moabs hovdingar saman med han. Balak spurde: «Kva sa Herren?»

¹⁸Då kvad Bileam: Reis deg, Balak, og høyr! Lyd på meg, du Sippors son!

¹⁹Gud er ikkje ein mann, ¬så han lyg, eit menneske, ¬så han skifter hug. Gjer han ikkje det han seier, held han ikkje det han lovar?

²⁰Eg fekk bod om å velsigna; velsignar han, ¬kan ikkje eg gjera det om.

²¹Eg ser ingen vondskap i Jakob, inga ulukke i Israel. Herren deira Gud er med dei, dei hyllar han som konge.

²²Gud førte dei ut or Egypt, og dei har styrke ¬som ein villokse. [41]

²³Det finst ingen som driv ¬med spådom i Jakob, ingen som tek varsel i Israel. I rette tid vert det sagt til Jakob, til Israel kva Gud vil gjera.

²⁴Sjå, folket reiser seg som ei løve, som ei løvinne fer det opp! Det legg seg ikkje til ro før det har metta seg med rov og drukke blodet ¬av dei det drap.

²⁵Då sa Balak til Bileam: «Kan du ikkje forbanna dei, må du iallfall ikkje velsigna dei!»

²⁶Men Bileam svara: «Har eg ikkje sagt deg at eg berre kan gjera som Herren seier?»

²⁷Då sa Balak til Bileam: «Kom, så skal eg ta deg med til ein annan stad. Kanskje Gud ikkje har noko imot at du forbannar folket derifrå.»

²⁸Så tok han Bileam med seg opp på toppen av Peor-fjellet, der ein kan sjå ut over det aude landet.

²⁹Då sa Bileam til han: «Bygg sju altar for meg her, og få tak i sju oksar og sju verar til meg!»

³⁰Balak gjorde som Bileam sa, og ofra ein okse og ein ver på kvart altar.