Read nynorsk 1978 4. Mosebok 25 Bible Online

4. Mosebok 25 - nynorsk 1978 bible

4. Mosebok 25

¹Medan israelittane heldt til i Sjittim, tok dei til å driva utukt med moabittkvinner, [45]

²som bad folket til offerfest for gudane sine. Folket var med på måltida og kasta seg ned for gudane deira;

³israelittane heldt seg til Ba’al-Peor. Då vart Herren brennande harm på dei, [46]

⁴og han sa til Moses: «Ta alle leiarane i folket og heng dei opp på ein stokk for Herren under open himmel! Så vil Herrens brennande vreide venda seg bort frå Israel.»

⁵Moses sa til styresmennene i Israel: «Kvar av dykk skal drepa dei av mennene sine som har halde seg til Ba’al-Peor.»

⁶Best det var, kom ein israelitt med ei kvinne frå Midjan. Han førte henne inn mellom landsmennene sine, midt for augo på Moses og heile Israels-lyden, der dei sat og gret attmed møteteltdøra. [47] [48]

⁷Då Pinhas, som var son til presten Elasar og soneson til Aron, såg det, reiste han seg, steig fram or flokken og treiv eit spyd.

⁸Så fylgde han etter israelitten inn i soveromet og rende spydet gjennom dei begge, både israelitten og kvinna, så det gjekk inn i livet hennar. Då stogga pesten som herja mellom israelittane.

⁹Men tjuefire tusen hadde mist livet i pesten.

¹⁰Herren sa til Moses:

¹¹«Pinhas, son til presten Elasar og soneson til Aron, har vendt harmen min bort frå israelittane, fordi han synte sin brennhug for meg mellom dei. Difor ville eg ikkje vera så streng at eg gjorde ende på dei.

¹²Av den grunn skal du seia: Eg gjer ei venskapspakt med han.

¹³Han og ætta hans etter han skal ha ein evig rett til å vera prestar, fordi han var brennhuga for Gud og gjorde soning for israelittane.»

¹⁴Namnet på den israelitten som vart drepen, han som vart stukken ned saman med midjanittkvinna, var Simri, son til Salu, ein av hovdingane i Simeons-ætta.

¹⁵Og den drepne midjanittkvinna heitte Kosbi; ho var dotter til Sur, som var hovding over ei av ættene i Midjan.

¹⁶Sidan sa Herren til Moses:

¹⁷«De skal gå til strid mot midjanittane og slå dei ned.

¹⁸For dei gjekk til strid og bruka list mot dykk, då det hende dette med Peor og med Kosbi, dotter til midjanitthovdingen, ho som vart drepen den gongen pesten herja etter hendinga med Peor.»

¹⁹Då pesten var over,