Read nynorsk 1978 4. Mosebok 28 Bible Online

4. Mosebok 28 - nynorsk 1978 bible

4. Mosebok 28

¹Herren sa til Moses:

²Gjev israelittane dette påbodet: Til fastsett tid må de syta for å bera fram for meg offergåvene mine av mat, eldoffer som angar godt for meg.

³Sei til dei: Dette er det eldofferet som de skal bera fram for Herren kvar dag: to årsgamle, lytelause lam. Det er det daglege brennofferet.

⁴Det eine lammet skal du ofra om morgonen og det andre om kvelden, straks etter soleglad.

⁵Som grødeoffer skal du bera fram ein tiandedels efa kveitemjøl, blanda med ein fjerdedels hin olje av knust oliven.

⁶Dette er det daglege brennofferet, som fyrst vart frambore ved Sinai-fjellet, eit eldoffer til godange for Herren.

⁷Drikkofferet som høyrer til det fyrste lammet, skal vera ein fjerdedels hin, eit offer av sterk drikk, som du ber fram for Herren i heilagdomen.

⁸Det andre lammet skal du ofra om kvelden, straks etter soleglad, og det same grødeofferet og drikkofferet som om morgonen. Det skal vera eit eldoffer som angar godt for Herren.

⁹På sabbatsdagen skal du ofra to årsgamle, lytelause lam, som grødeoffer to tiandedels efa kveitemjøl, blanda med olje, og drikkofferet som høyrer til.

¹⁰Dette er det serskilde brennofferet som skal berast fram kvar sabbat, attåt det daglege brennofferet og drikkofferet som høyrer til.

¹¹Den fyrste dagen i kvar månad skal de bera fram eit brennoffer for Herren: to unge oksar, ein ver og sju årsgamle, lytelause lam.

¹²For kvar okse skal de bera fram eit grødeoffer på tre tiandedels efa kveitemjøl, blanda med olje, for den eine veren to tiandedels efa kveitemjøl, blanda med olje,

¹³og for kvart lam ein tiandedels efa kveitemjøl, blanda med olje. Såleis skal brennofferet vera, eit eldoffer som angar godt for Herren.

¹⁴Drikkoffera som høyrer til, skal vera ein halv hin vin for kvar okse, ein tredjedels hin for veren og ein fjerdedels hin for kvart lam. Dette er nymåne-brennofferet, som skal berast fram kvar nymånedag i året.

¹⁵Ein bukk skal de òg ofra som syndoffer til Herren, attåt det daglege brennofferet og drikkofferet som høyrer til.

¹⁶Den fjortande dagen i den fyrste månaden er det påskehelg for Herren.

¹⁷Og frå den femtande dagen i same månaden er det høgtid; då skal de eta usyrt brød i sju dagar.

¹⁸Den fyrste dagen skal de halda ei heilag samling. Då må de ikkje gjera noko arbeid.

¹⁹Som brennoffer, eldoffer for Herren, skal de bera fram to unge oksar, ein ver og sju årsgamle lam; og dei må vera utan lyte.

²⁰Grødeofferet som høyrer til, skal vera kveitemjøl, blanda med olje, tre tiandedels efa for kvar okse, to tiandedels efa for veren

²¹og ein tiandedels efa for kvart av dei sju lamma.

²²Ein bukk skal de bera fram som syndoffer til soning for dykk.

²³Dette skal de ofra attåt den delen av det daglege brennofferet som vert frambore om morgonen.

²⁴Slike offer skal de bera fram kvar av dei sju dagane. Det er eldoffermat som angar godt for Herren. Attåt det daglege brennofferet skal de bera det fram, med drikkofferet som høyrer til.

²⁵Den sjuande dagen skal det vera heilag samling. Då må de ikkje gjera noko arbeid.

²⁶På fyrstegrødedagen, når de høgtidar sjuvekehelga og ber fram for Herren offer av den nye grøda, skal det vera heilag samling. Då må de ikkje gjera noko arbeid.

²⁷De skal bera fram eit brennoffer til godange for Herren: to unge oksar, ein ver og sju årsgamle lam.

²⁸Grødeofferet som høyrer til, skal vera kveitemjøl, blanda med olje, tre tiandedels efa for kvar okse, to tiandedels efa for veren

²⁹og ein tiandedels efa for kvart av dei sju lamma.

³⁰Ein bukk skal de bera fram til soning for syndene dykkar.

³¹Dette skal de ofra attåt det daglege brennofferet med grødeofferet og drikkofferet som høyrer til. Og dyra må vera utan lyte.